Ateb y Galw: Y gantores Kizzy Crawford
- Cyhoeddwyd
Kizzy Crawford, y gantores a'r cyflwynydd, sy'n Ateb y Galw yr wythnos yma, wedi iddi gael ei henwebu gan Mererid Hopwood yr wythnos diwetha'.
Beth ydi dy atgof cyntaf?
Eistedd ar stôl fach bren o flaen y teledu yn nhŷ un o ffrindiau Mam tra roedd Mam a'i ffrind yn y gegin yn siarad. O'n i'n tua 2 oed a dwi'n cofio teimlo'n grac a trist nad oedden nhw'n cynnwys fi yn y sgwrs!
Pwy oeddet ti'n ei ffansio pan yn iau?
Noel Fielding - o'n i'n obsessed gyda fe!
Mae pawb yn hoffi rhywun sy'n gallu gwneud iddyn nhw chwerthin...
Beth oedd y digwyddiad a gododd y mwya' o gywilydd arnat ti erioed?
Yfed gormod ar ôl chwarae gig ym Merthyr ac yna gorfod mynd mewn ambiwlans ac wedyn chwarae gig yn Ponty y diwrnod wedyn... worst hangover ever...!
Pryd oedd y tro diwethaf i ti grïo?
Wythnos diwethaf yn gwylio Peter Rabbit yn y sinema gyda fy chwaer fach.
Oes gen ti unrhyw arferion drwg?
Dwi'n beirniadu fy hun gormod.
Dy hoff le yng Nghymru a pham?
Mae hwnna'n gwestiwn anodd - mae 'na gymaint o lefydd byddai'n dweud yw fy hoff le. Dwi'n dwli ar y mynyddoedd yng nghefn gwlad a natur a mae'r pethau yma bron ym mhob man.
Dwi'n caru lle dwi'n byw yn Aberfan a hefyd yn caru Caerdydd, Bannau Brycheiniog a mynyddoedd y gogledd a gerddi Tyglyn yng Nghiliau Aeron.
Mae'r gerddi yma yn Nhyglyn, Ciliau Aeron yn agos at galon Kizzy
Y noson orau i ti ei chael erioed?
Fi 'di cael llwyth o nosweithau grêt, 'sai gyda hoff un ond maen nhw i gyd i wneud gyda naill ai cerddoriaeth neu natur.
Disgrifia dy hun mewn tri gair
Creadigol, ysbrydol, figan.
Beth yw dy hoff lyfr neu ffilm?
Fy hoff lyfr yw The Shack gan W M Paul Young.
Byw neu farw, gyda phwy fyddet ti'n cael diod. Pam?
Erykah Badu achos hi yw un o fy nylanwadau mwyaf.
O Archif Ateb y Galw:
Dyweda rywbeth amdanat ti dy hun nad oes yna lawer o bobl yn ei wybod.
Mae gen i gi o'r enw Mabli i helpu fi gyda fy mhryder ac hefyd achos fi'n caru cŵn ac anifeiliaid.
Ar dy ddiwrnod olaf ar y blaned, beth fyddet ti'n ei wneud?
Rhoi mlaen gŵyl cerddorol anhygoel yn y mynyddoedd a'r goedwig.
Mae Kizzy wedi canu mewn gwyliau di-ri' ar draws Cymru, a thu hwnt - byddai hi'n sicr yn gwybod beth sydd ei angen er mwyn cynnal gŵyl lwyddiannus!
Beth yw dy hoff gân a pham?
Mae'n newid o dydd i ddydd, ond ar hyn o bryd - H-Gang gan Donald Fagen achos dwin caru'r harmonïau a'r naws jazz.
Cwrs cyntaf, prif gwrs a phwdin - beth fyddai'r dewis?
Rhywbeth figan gydag afocado, rhywbeth figan gyda falafel, cacen siocled figan.
Petaset yn gallu bod yn rhywun arall am ddiwrnod, pwy fyddai fo/hi?
Aderyn fel bod fi'n gallu hedfan.
Pwy sydd yn Ateb y Galw wythnos nesaf?
Ed Holden