Roque Mesa yn gadael Abertawe ac yn arwyddo i Sevilla

Mae'r chwaraewr canol cae Roque Mesa wedi gadael Abertawe ar ôl tymor yn unig wedi iddyn nhw ddisgyn o'r Uwch Gynghrair.

Arwyddodd y Sbaenwr y llynedd am £11m o Las Palmas, ond ers mis Ionawr mae wedi bod ar fenthyg yn Sevilla.

Mae Sevilla bellach wedi ei arwyddo'n barhaol am ffi sydd heb ei ddatgelu, ond y gred yw ei fod tua £8m.

Dim ond naw gwaith y dechreuodd Mesa yn yr Uwch Gynghrair i Abertawe'r tymor diwethaf cyn dychwelyd i La Liga hanner ffordd drwy'r tymor.

Ers i'r Elyrch ddisgyn o'r Uwch Gynghrair mae'r chwaraewyr canol cae Ki-Sung Yeung a Leon Britton, yr amddiffynnwr Angel Rangel, a'r asgellwr Kenji Gorre wedi gadael y clwb ar ôl i'w cytundebau ddod i ben.

Mae'r golwr Lukasz Fabianski hefyd wedi symud i West Ham am ffi o tua £6m, ac mae'r clwb o Lundain hefyd wedi dangos diddordeb yn amddiffynnwr Abertawe Alfie Mawson.