'Angen codi tâl ar "yfwyr anghyfrifol" am ambiwlansys'

Mae Suzy Davies AC yn cynnig codi tâl ar "yfwyr anghyfrifol" sy'n defnyddio'r gwasanaethau brys

Dylai "yfwyr anghyfrifol" sydd angen ambiwlans orfod talu am y gwasanaeth, yn ôl ymgeisydd ar gyfer arweinyddiaeth y Ceidwadwyr Cymreig.

Mae AC De Orllewin Cymru, Suzy Davies, yn bwriadu cyflwyno'r syniad mewn araith ym Mhen-y-bont ddydd Llun wrth lansio'i hymgyrch.

Dywedodd wrth BBC Cymru pan mae rhywun ar fai mewn damwain ffordd maent o bosib yn gorfod talu am gost y gwasanaethau brys.

Mae cais wedi cael ei wneud i Wasanaeth Ambiwlans Cymru am sylw.

• Dau ymgeisydd i arwain Ceidwadwyr Cymru

• Suzy Davies eisiau arwain y Ceidwadwyr

Bydd Ms Davies, sy'n ymgeisio yn erbyn Paul Davies AC Preseli Penfro, i arwain grŵp y Ceidwadwyr ym Mae Caerdydd, yn dweud: "Gallwn ni gyd fod yn gyfrifol am ein gweithredoedd.

"Dyna pam fy mod yn dweud y dylai pobl sy'n gwastraffu amser prin ein gwasanaeth ambiwlans drwy yfed mewn ffordd anghyfrifol orfod talu am y gwasanaeth."

Dywedodd tîm ymgyrchu Ms Davies bod ffigyrau diweddar yn dangos fod cost galw ambiwlans ar gyfartaledd yn £155.

Wrth siarad cyn ei haraith, dywedodd: "Gwasanaeth Ambiwlans Cymru ddylai gynghori ar faint o amser y mae nhw yn ei dreulio yn delio â diotwyr anghyfrifol.

"Eisoes mae yna gynsail wedi'i osod ar gyfer hyn.

"Pam mae 'na wrthdrawiad ffordd lle mae rhywun ar fai, mi allai'r person yna eisoes orfod ad-dalu y gwasanaethau brys."

Mae Gwasanaeth Ambiwlans Cymru yn delio â mwy na 250,000 galwad frys y flwyddyn

Mae disgwyl i Ms Davies hefyd ddweud ei bod hi'n awyddus i "uno ac ysbrydoli cefnogwyr oes y Ceidwadwyr yn ogystal â chyrraedd aelodau newydd".

Bydd yn awgrymu ei bod yn "adnabyddus am ddenu sylw pobl nad ydynt yn Geidwadwyr "naturiol" - fel bod modd i'r Ceidwadwyr "allu adlewyrchu'r cymunedau maent yn eu cynrychioli yn well, creu dadleuon newydd ac ennill mwy o seddi".

Yn ôl Ms Davies: "Mae hyn yn golygu cyfathrebu'n well a rhannu grym o fewn y blaid, eglurdeb ar ystyr "arweinydd Cymreig" a hunaniaeth ddigamsyniol Gymreig sy'n siarad yn uniongyrchol ag anghenion Cymru."

Mae Ms Davies - a'i hunig wrthwynebydd, Paul Davies - yn ymgeisio am yr arweinyddiaeth wedi i Andrew RT Davies ymddiswyddo ym mis Mehefin.

Lansiodd Paul Davies ei ymgyrch yr wythnos ddiwethaf.