Sicrhau lle canolog i'r celfyddydau ym mywyd y genedl

cyngor y celfyddydaucyngor y celfyddydau

Mae Cyngor Celfyddydau Cymru am "sicrhau bod y celfyddydau'n ganolog i fywyd a llesiant y genedl", wrth iddynt lansio eu cynllun corfforaethol ar gyfer y pum mlynedd nesaf.

Dwy flaenoriaeth sydd gan y cynllun sef hyrwyddo cydraddoldeb er mwyn ehangu i bob cymuned yng Nghymru, a chryfhau gallu a gwydnwch y sector i helpu doniau creadigol ffynnu.

Yn ôl y Cyngor, bydd ymrwymo i'r rhain yn galluogi iddynt "weithio'n fwy effeithiol, a chydweithio'n fwy dychmyglon â phartneriaid o'r un meddylfryd ledled Cymru".

Dywedodd Phil George, Cadeirydd y Cyngor, fod y corff yn "ymrwymedig i ragoriaeth a chefnogi celfyddyd bryfoclyd, arloesol a dewr".

'Haws dweud na gwneud'

Ychwanegodd Mr George y bydd cyflawni hyn yn haws "dweud na gwneud", gan fod "gormod o bobl yn cael eu hamddifadu o'r cyfle i fwynhau'r celfyddydau neu gymryd rhan neu weithio ynddynt,"

"Credwn fod cael profiadau celfyddydol a mynegi'r dychymyg er mwyn gwella bywyd yn hanfodol i gymdeithas iach a deinamig ac felly dylent fod ar gael i bawb."

Phil George yw cadeirydd Cyngor Celfyddydau Cymru

Camau i sicrhau lle canolog i'r celfyddydau:

  • Darparu arian a chefnogaeth i annog gwydnwch ymhlith artistiaid a sefydliadau celfyddydol

  • Cynyddu'r buddsoddiad yng ngwaith creadigol artistiaid duon, Asiaidd ac ethnig, pobl anabl a'r rheini sy'n gweithio drwy gyfrwng y Gymraeg

  • Ymgyrchu dros gael rhagor o amrywiaeth yng ngweithlu'r celfyddydau

  • Ymestyn eu gwaith gyda phlant a phobl ifainc

  • Cael y gorau o'r cyfleoedd o weithio'n rhyngwladol

Fe gafodd Nick Capaldi ei benodi'n Brif Weithredwr Cymgor Celfyddydau Cymru yn 2008

'Chwalu'r myth'

Yn ôl Nick Capaldi, Prif Weithredwr Cyngor Celfyddydau Cymru, mae'r cyngor wedi "gweithio'n galed i chwalu'r myth mai dim ond lleiafrif bach sy'n cael gwerth a manteision o'r celfyddydau".

"Ond dengys y dystiolaeth, er gwaethaf rhywfaint o lwyddiant, na wnawn ddigon o hyd i gyrraedd y nod," meddai.

Ychwanegodd: "Bydd dymchwel y rhwystrau diwylliannol, cymdeithasol ac economaidd yn un o'n prif flaenoriaethau dros gyfnod y cynllun, yn ogystal â pharhau i hyrwyddo rhagoriaeth ac annog cynhyrchu'r gorau yn ein celfyddydau".

Straeon perthnasol