Bachgen bach tair oed wedi marw mewn gwrthdrawiad fferm

Roedd Evan Lloyd Williams yn byw gyda'i rieni a'i frawd a chwaer, ac roedd wedi dechrau mynychu dosbarthiadau yn yr ysgol feithrin

Mae Heddlu Dyfed-Powys yn ymchwilio i amgylchiadau marwolaeth plentyn tair oed ar fferm ar ffin Ceredigion a Sir Gaerfyrddin.

Cafodd Evan Lloyd Williams ei daro gan gerbyd brynhawn Sul.

Roedd Evan wedi mynd gyda'i dad at dir oedd yn cael ei rhentu gan y teulu ger Llanybydder pan ddigwyddodd y gwrthdrawiad.

Cafodd yr heddlu eu galw am tua 16:25 ddydd Sul yn dilyn adroddiad o wrthdrawiad rhwng cerbyd a phlentyn ar eiddo preifat.

'Calonnau'n gwaedu'

Roedd Evan yn byw gyda'i rieni a'i frawd a chwaer, ac roedd wedi dechrau mynychu dosbarthiadau yn yr ysgol feithrin.

Mae'r teulu'n byw chwe milltir i ffwrdd o'r fferm, yng Ngorsgoch ger Llanbedr Pont Steffan.

Dywedodd y cynghorydd sir lleol Euros Davies fod y newyddion wedi bod yn sioc fawr i'r gymuned leol ac y byddan nhw'n gwneud popeth i gefnogi'r teulu.

"Mae wedi bod yn newyddion trychinebus iawn, mae pob un mewn sioc a chalonnau yn gwaedu dros y teulu bach yma."

Ychwanegodd Nia Lloyd Thomas, Pennaeth Ysgol Bro Siôn Cwilt: "Roedd Evan yn ddisgybl gwerthfawr, poblogaidd ac yn aelod amhrisiadwy o deulu Ysgol Bro Siôn Cwilt.

"Bydd ei golled yn enfawr i holl gymuned yr ysgol sydd yn dyst o'i bersonoliaeth a'i natur hyfryd.

"Carwn ni oll anfon ein cydymdeimlad diffuant i rieni Evan, ei frawd a'i chwaer fawr ynghyd â'r teulu oll yn ystod y cyfnod ofnadwy o drist ac anodd hwn."

Ymateb heddlu

Mae'r teulu nawr yn derbyn cymorth gan swyddogion arbenigol.

Dywedodd llefarydd ar ran Heddlu Dyfed Powys: "Gyda thristwch enfawr gallwn gadarnhau mai'r plentyn a fu farw'n sydyn ger Llanybydder yw Evan Lloyd Williams.

"Yn anffodus, bu farw'r plentyn ar leoliad. Mae ein meddyliau i gyd gyda'r teulu."

Dywedodd llefarydd ar ran y Gweithgor Iechyd a Diogelwch: "Mae'r Gweithgor yn ymwybodol o'r digwyddiad ac yn gweithio ar y cyd gyda'r heddlu - sy'n arwain yr ymchwiliad yma."