Cyhoeddi enw gyrrwr cwad wedi gwrthdrawiad angheuol

Digwyddodd y gwrthdrawiad ar ffordd gefn rhwng Cilycwm a Rhandirmwyn

Mae Heddlu Dyfed-Powys wedi cyhoeddi enw'r beiciwr cwad a fu farw yn dilyn gwrthdrawiad yn ardal Cilycwm, Sir Gaerfyrddin nos Sadwrn.

Roedd Lloyd Price Jones yn 38 oed ac yn byw yn lleol.

Mae'r heddlu yn parhau i apelio am unrhyw dystion i'r digwyddiad.

Dim ond un cerbyd oedd yn rhan o'r gwrthdrawiad, a ddigwyddodd ar lôn gefn rhwng pentref Cilycwm a Rhandirmwyn tua 22:35.

Cafodd Mr Jones ei gludo i Ysbyty Athrofaol Cymru yng Nghaerdydd gydag anafiadau difrifol, a bu farw ddydd Sul.