Datgelu llinell goll y limrig
- Cyhoeddwyd
Hir yw pob ymaros, ond o'r diwedd mae'r disgwyl ar ben wrth i Cymru Fyw gyhoeddi eich campweithiau ar gyfer llinell goll ein limrig.
Yr wythnos diwetha' fe wnaethom osod her i'n darllenwyr - gorffen limrig i nodi pen-blwydd arbennig rhaglen radio Y Talwrn.
Mae'r rhaglen ar Radio Cymru, lle mae beirdd yn cystadlu yn erbyn ei gilydd drwy gyfansoddi cerddi, yn dathlu ei phen-blwydd yn 40 oed eleni.
Oedd eich llinell chi cystal ag un Geraint Løvgreen?
Felly fe wnaethom ni ofyn i Geraint Løvgreen - sy'n cystadlu efo tîm Caernarfon yn Y Talwrn ers blynyddoedd - sgwennu limrig.
Dyma hi:
Mae'r Talwrn yn ddeugain eleni!
Roedd hanner y beirdd heb eu geni
pan ddechreuodd y sioe -
ond mae'n teimlo fel ddoe
.........?
Fe wnaethom ni ddileu'r linell olaf a gofyn i chi roi cynnig arni.
Mae'r campweithiau wedi ein cyrraedd ni, ac mae'n fraint ac anrhydedd i Cymru Fyw eu cyhoeddi nhw heddiw.
Felly yn nhraddodiad seremoni'r Cadeirio - ond heb gadair, na gwobr, na beirniadaeth, na chlod, na chystadleuaeth, na seremoni, na 'a oes heddwch', na 'HEDDWCH!', na ffanfer, na dim - dyma i chi'r goreuon:
ac yn dal werth pob un ffadan beni! (Emlyn Williams)
Hei lwc am y cant - ewch amdani! (Nia Derec)
Dim ond pumtheg a wen efo acni. (Aled Lewis, Capel Newydd Sir Benfro)
Yr aethom i gyd dros ben llestri. (Dylan)
Ers i ni agor y llenni. (Dylan Ellis)
I greadur o fy oedran i! (Ann Thomas - Caerdydd)
Ers mentro ac agor y llenni. (Glain)
Er gweld bod 'rhen Løvgreen 'di moeli. (Sydney Davies, cyn aelod o dîm y Berwyn)
Hen amser fe ddaw at ddadeni. (Huw Rowlands, Y Fenni)
Am odlau mae pawb yn ymboeni. (John Samuel, Swydd Gaint)
Amser 'di hedfan wrth farddoni. (Lorna Herbert Egan, Llanfairpwll)
I'r gweddill o hyd yn barddoni. (Don Treharne, Pontarddulais )
A wela i'r peth yn dibenni. (David Arwyn Edmunds)
Pan oedd beirdd yn cael deg pwynt gan Gerry. (J L Davies)
Felly heddi mae'n sereni. (Peter Esau)
Pan drechais i'r giwad ym mhen i. (Rós)
Bydd Talwrn am byth hyd y gwn i. (Len Shurey, Caerffili)
Diolch yn fawr i bawb wnaeth anfon llinell!
Ydyn nhw'n rhagori ar linell olaf Geraint Løvgreen i'w limrig ei hun?
Wnawn ni adael i chi benderfynu. Dyma ei gerdd o yn gyflawn.
Mae'r Talwrn yn ddeugain eleni!
Roedd hanner y beirdd heb eu geni
Pan ddechreuodd y sioe -
Ond mae'n teimlo fel ddoe!
Mae o'n amlwg 'di drysu fy mhen i.
Hefyd o ddiddordeb: