May: Cymru i gael mwy o rôl yn nhrafodaethau Brexit

Theresa May

Mae Prif Weinidog y Deyrnas Unedig, Theresa May wedi dweud y bydd gan Lywodraeth Cymru "fwy o rôl" yng ngham nesaf trafodaethau Brexit.

Os na fydd Mrs May yn ennill cefnogaeth i'w chynllun, bydd y DU yn gadael yr Undeb Ewropeaidd heb gytundeb ar 29 Mawrth.

Dywedodd Prif Weinidog Cymru, Mark Drakeford ar Twitter fod "perygl gwirioneddol" y bydd hynny'n digwydd.

Yn siarad yn Nhŷ'r Cyffredin ddydd Llun, dywedodd Mrs May: "Er mai llywodraeth ei Mawrhydi fydd wastad yn negydu ar ran y DU gyfan, rydym hefyd wedi ymrwymo i roi mwy o rôl i'r [llywodraethau] datganoledig yn y cam nesaf, gan barchu eu gallu a'u diddordebau hanfodol yn y trafodaethau hyn.

"Rwy'n gobeithio cwrdd â Phrif Weinidogion yn ystod yr wythnos hon a byddaf yn defnyddio'r cyfle i drafod hyn ymhellach gyda nhw."

Dywedodd llefarydd ar ran Llywodraeth Cymru eu bod yn gobeithio y bydd cyfarfod rhwng Mrs May a Mr Drakeford yn digwydd yr wythnos hon.

Nid yw’r post yma ar X yn gallu ymddangos yn y porwr. Os gwelwch yn dda defnyddiwch Javascript neu geisio eto ar borwr gwahanol.Gweld y cynnwys gwreiddiol ar X.
Nid yw'r BBC yn gyfrifol am gynnwys safleoedd allanol
I osgoi neges X gan Mark Drakeford

Caniatáu cynnwys X?

Mae’r erthygl yma’n cynnwys elfennau sydd wedi eu darparu gan X. Gofynnwn am eich caniatâd cyn eu llwytho, oherwydd fe allai wneud defnydd o cwcis a thechnolegau eraill. Efallai y byddwch am ddarllen polisi cwcis X a pholisi preifatrwydd cyn derbyn. I weld y cynnwys yma dewiswch ‘derbyn a pharhau’.

Nid yw'r BBC yn gyfrifol am gynnwys safleoedd allanol

Yn dilyn datganiad Mrs May ddydd Llun fe wnaeth AS Ceidwadol Aberconwy, Guto Bebb, ei chyhuddo o wneud diddordebau gwleidyddol y Ceidwadwyr yn fwy o flaenoriaeth na lles y DU.

Ychwanegodd y cyn-weinidog bod strategaeth y Prif Weinidog yn "bryderus iawn".

Canslo ffi £65

Fe gadarnhaodd Mrs May hefyd na fydd trigolion Ewropeaidd yn gorfod talu ffi o £65 am yr hawl i barhau i fyw yn y DU wedi Brexit.

Cafodd y cyhoeddiad ei groesawu gan arweinydd y brif wrthblaid, Jeremy Corbyn.

Yr wythnos diwethaf cafodd Mrs May ei threchu yn drwm yn Nhŷ'r Cyffredin ar ei chytundeb Brexit.

Yn syth ar ôl y bleidlais fe alwodd arweinydd y blaid Lafur, Mr Corbyn, am bleidlais o ddiffyg hyder yn y llywodraeth.

Fe bleidleisiodd 325 o aelodau seneddol o blaid llywodraeth Mrs May, a 306 yn erbyn - mwyafrif o 19.

Straeon perthnasol