Enwi'r dyn fu farw mewn gwrthdrawiad yn Ystradgynlais

Mae'r heddlu'n parhau i apelio am dystion wedi gwrthdrawiad rhwng car a cherddwr yn Ystradgynlais

Mae Heddlu Dyfed-Powys wedi cadarnhau mai Meirion Huw Lloyd, 74 oed o Ystradgynlais, yw enw'r dyn fu farw yn dilyn gwrthdrawiad ym Mhowys nos Sadwrn.

Cafodd yr heddlu eu galw i Heol Castell-nedd yn Ystradgynlais tua 21:00 ddydd Sadwrn i ymateb i wrthdrawiad yn cynnwys Renault Clio coch a cherddwr.

Bu farw Mr Lloyd, oedd yn cerdded ar hyd y ffordd, yn y fan a'r lle.

Mae'r heddlu'n parhau i apelio am dystion i'r gwrthdrawiad, ac yn galw ar unrhyw un welodd Mr Lloyd ar hyd y ffordd cyn y digwyddiad i gysylltu gyda nhw.