Wrecsam i drin gwastraff clinigol o'r Alban
- Cyhoeddwyd
Fe fydd gwastraff meddygol yn cael ei yrru o ysbytai'r Alban i Wrecsam
Bydd gwastraff clinigol ysbytai Yr Alban yn cael ei yrru i ogledd Cymru ar ôl i gwmni gwaredu gwastraff clinigol gael ei roi yn nwylo'r gweinyddwyr.
Daw hyn wedi i Healthcare Environmental Services (HES) golli cytundeb gwerth miliynau o bunnoedd gyda gwasanaeth iechyd Yr Alban oherwydd sgandal yn ymwneud â phentyrru gwastraff meddygol.
Nawr bydd gwastraff bagiau melyn o ysbytai'r Alban - yn cynnwys eitemau fel nodwyddau meddygol - yn cael eu hanfon i ganolfan yn Wrecsam.
Cyhoeddodd Llywodraeth Yr Alban y bydd gwastraff bagiau oren hefyd yn cael eu trin dros dro yn Wrecsam.
Mae'r safle yng ngogledd-ddwyrain Cymru yn eiddo i gwmni Sbaeneg - Tradebe Healthcare National.
Mae Llywodraeth Yr Alban wedi cytuno ar gytundeb gwaredu newydd gyda'r cwmni - a bydd y cytundeb yn dod i rym ym mis Awst.
Yn y dyfodol fe fydd gwastraff bagiau oren o'r Alban yn cael ei drin mewn safle newydd y mae'r cwmni ar fin ei agor yn Lanarkshire.
Fe aeth HES i ddwylo'r gweinyddwyr fis diwethaf. Cyn hynny, roedden nhw'n gyfrifol am wastraff pob ysbyty, meddygfa, deintyddfa a fferyllfa yn Yr Alban.