Cydnabod Plaid Brexit fel grŵp swyddogol yn y Cynulliad
- Cyhoeddwyd
Fe wnaeth Nigel Farage ymweld ag aelodau'r grŵp newydd fore Mercher diwethaf
Mae Plaid Brexit wedi cael eu cydnabod fel grŵp swyddogol yn y Senedd ym Mae Caerdydd.
Dywedodd y Llywydd wrth arweinydd y grŵp, Mark Reckless bod rheolau'r Cynulliad yn caniatáu hynny.
Roedd Mr Reckless yn falch fod y penderfyniad wedi cael ei wneud, ond dywedodd ei fod yn synnu fod y broses wedi cymryd mor hir.
Mae hyn yn golygu fod gan y grŵp o bedwar sy'n gyn-aelodau cynulliad UKIP y modd i gyflogi mwy o staff.
Mae'r Cynulliad wedi cael cais am sylw.
Yr wythnos ddiwethaf, fe gyhoeddodd Plaid Brexit eu bod wedi gwneud cais i ffurfio grŵp gwleidyddol newydd yng Nghymru.
Fe gafodd y pedwar aelod - Mark Reckless, Mandy Jones, Caroline Jones a David Rowlands - eu cyfarch gan yr arweinydd, Nigel Farage y tu allan i adeilad y Senedd.
Mewn llythyr at Lywydd y Cynulliad, Elin Jones AC, dywedodd y pedwar eu bod am i Mr Reckless arwain y grŵp, gyda Caroline Jones fel trefnydd busnes a David Rowlands yn parhau fel comisiynydd.
Dywedodd Mr Farage bod hyn yn arwydd o "gefnogwyr yr ymgyrch i adael yr UE i gyd yn dod at ei gilydd unwaith eto".
Ond roedd yn rhaid i'r pedwar AC sydd wedi ymuno â Phlaid Brexit brofi eu haelodaeth cyn cael yr hawl i ffurfio grŵp swyddogol yn y Senedd.
Caniatáu cynnwys Twitter?
Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter, dolen allanol a pholisi preifatrwydd, dolen allanol cyn derbyn. Er mwyn gweld y cynnwys dewiswch ‘derbyn a pharhau’.
Straeon perthnasol
- Cyhoeddwyd16 Mai 2019
