Cyhoeddi rhestr fer Ysgoloriaeth Bryn Terfel 2019

Bryn Terfel

Bydd yr ysgoloriaeth eleni ar nos Wener 11 Hydref yn Neuadd Goffa'r Barri

Mae panel o feirniaid wedi dewis y chwe chystadleuydd fydd yn ymgeisio am Ysgoloriaeth Urdd Gobaith Cymru Bryn Terfel eleni.

Ym marn y panel, dyma oedd y cystadleuwyr mwyaf addawol o fewn y categori oedran hŷn o dan 25 oed.

Meithrin talent rhai o berfformwyr ifanc gorau Cymru yw nod y cynllun ac mae'r enillydd yn derbyn gwobr ariannol o £4,000.

Ond i nodi 20 mlynedd ers sefydlu'r ysgoloriaeth eleni, fe fydd hefyd yn perfformio yn un o'r dathliadau byd-eang ar gyfer Dydd Gŵyl Dewi 2020.

Y chwech fydd yn cystadlu eleni fydd:

  • Rhydian Jenkins - Aelod Unigol Cylch Ogwr, Morgannwg Ganol

  • Cai Fôn Davies - Aelod JMJ, Eryri

  • Steffan Lloyd Owen - Aelod Unigol, Cylch Cefni, Ynys Môn

  • Daniel Jones - Ysgol Gyfun Plasmawr, Caerdydd a'r Fro

  • Thomas Mathias- Aelod Unigol Cylch Aberystwyth, Ceredigion

  • Morgan Llywelyn Jones - Aelwyd y Gwendraeth, Gorllewin Myrddin

Jeremy Huw Williams, Ffion Dafis, Einir Wyn Jones, Cerian Mai Phillips a Glain Dafydd oedd ar y panel dewis, gan ystyried perfformiadau ymgeiswyr mewn naw o gystadlaethau canu, chwarae offeryn, llefaru, actio, a dawnsio.

Bydd yr Ysgoloriaeth eleni ar 11 Hydref yn Neuadd Goffa'r Barri, a'r tocynnau ar werth ddiwedd Mehefin.

Dywedodd y panel: "Mae wedi bod yn brofiad ac yn broses bleserus gwylio'r fath dalent ond roedd y chwe pherfformiwr yma yn serennu a hynny yn y modd roeddent yn cyfathrebu â'u cynulleidfa ac oherwydd i ni gael ein cyffroi."

Straeon perthnasol