Euro 2020: Her enfawr i Gymru yn Croatia

Lluniau Getty

Sgoriodd Dan James i Gymru ar ei ymddangosiad llawn cyntaf yn y fuddugoliaeth yn erbyn Slofacia

Mae pêl-droedwyr Cymru yn paratoi i wynebu "her enfawr" wrth iddyn nhw wynebu Croatia yn Osijek brynhawn Sadwrn (14:00).

Dywedodd y rheolwr Ryan Giggs: "Mae'n her enfawr wynebu tîm sydd wedi bod yn rownd derfynol Cwpan y Byd, ac maen nhw'n dîm sy'n cynnwys chwaraewyr fel Luka Modric."

Ac fe gyfaddefodd Giggs bod y gwres llethol yn Osijek - fydd tua 30ºC yn ystod y gêm - yn sialens hefyd: "Mae'n anodd paratoi.

"Dyw'r tywydd ddim fel hyn yn Wrecsam! Fe aethon ni i Bortiwgal i ymarfer er mwyn cael rhywfaint o wres ond roedd yr awel yno wedi oeri pethau rhywfaint.

"Mae'n rhaid i ni baratoi yn iawn ac yfed digon o ddŵr."

Dan James ac Ethan Ampadu yn barod

Bydd hyder y garfan yn gadarn ar ôl curo Slofacia 1-0 yn rownd gyntaf y gystadleuaeth. Ac fe gafodd y tîm hwb pellach ar ôl clywed bod Ben Davies yn barod i chwarae wedi iddo ohirio ei lawdriniaeth.

Mae Ethan Ampadu hefyd yn holliach ar ôl gwella o anaf i'w gefn.

Bydd Dan James yn barod hefyd ar ôl cwblhau ei drosglwyddiad i Manchester United ddydd Gwener.

Ond mae record gartref Croatia yn ardderchog - ers eu gêm gyntaf yn y gystadleuaeth Ewropeaidd yn 1994 dy'n nhw ddim wedi colli ar eu tir eu hunain.

Maen nhw wedi llwyddo i osgoi colli adref yn eu 23 gêm ddiwethaf ymhob cystadleuaeth.

Lluniau Getty

Gareth Bale yn dathlu'r fuddugoliaeth yn erbyn Slofacia

Fe ddechreuodd Croatia eu hymgyrch Ewropeaidd ym mis Mawrth gyda buddugoliaeth 2-1 adref yn erbyn Azerbaijan.

Dridiau yn ddiweddarach roedd yna ergyd i'w gobeithion wrth iddyn nhw golli 2-1 yn erbyn Hwngari yn Budapest.

Hwngari fydd gwrthwynebwyr nesaf Cymru, wrth i garfan Ryan Giggs deithio i Budapest ar gyfer her anodd arall.

Straeon perthnasol