Dylan Jones yw Llywydd Eisteddfod Genedlaethol Sir Conwy

Y newyddiadurwr a'r cyflwynydd Dylan Jones fydd Llywydd Eisteddfod Genedlaethol Sir Conwy 2019.

Mae cyflwynydd rhaglenni Post Cyntaf ac Ar y Marc ar BBC Radio Cymru yn hanu o bentref Capel Garmon ger Llanrwst ac yn gyn-ddisgybl Ysgol Dyffryn Conwy.

Fel rhan o'i rôl fe fydd yn annerch cynulleidfa'r Pafiliwn o'r llwyfan yn ystod wythnos yr Eisteddfod, sy'n cael ei chynnal ar gyrion Llanrwst.

Dywedodd wrth Cymru Fyw: "Dyma fydd y tro cynta' i mi gael llwyfan yn y Genedlaethol!

"Mae'n anrhydedd mawr - mae 'na lawer mwy o bobl sy'n ymwneud â Steddfoda' a'r pethe na fi, yn saff."

• Cyflwyno Cadair a Choron Eisteddfod Sir Conwy

• Dim tocyn ar ôl i sioe Te yn y Grug yr Eisteddfod

• Eisteddfod Genedlaethol 2019 yn aros yn Llanrwst

Ar ôl graddio mewn Gwleidyddiaeth ym Mhrifysgol Aberystwyth, fe fu'n athro hanes yn Ysgol Maes Garmon, Yr Wyddgrug ac yn bennaeth adran yn Ysgol Glan Clwyd, Llanelwy.

Ymunodd ag Adran Newyddion BBC Cymru - flwyddyn ar ôl gohebu ar drychineb Hillsborough ag yntau yno fel sylwebydd pêl-droed.

Cafodd ei benodi yn y lle cyntaf fel gohebydd y gogledd ddwyrain, ond bu hefyd yn ymdrin â straeon Prydeinig a rhyngwladol yn cynnwys llofruddiaeth James Bulger, trychineb Dunblane, marwolaeth y Dywysoges Diana ym Mharis, a digwyddiadau ym Mhacistan wedi ymosodiadau 9/11.

• Huw Stephens yw Llywydd Prifwyl Caerdydd

• Osian Roberts yw Llywydd Eisteddfod Ynys Môn

Dechreuodd gyflwyno rhaglen Taro'r Post ar Radio Cymru yn 2002 cyn symud i'r Post Cyntaf yn 2013.

Mae'n cyflwyno'r rhaglen bêl-droed boblogaidd Ar y Marc bob bore Sadwrn es 1992, ac yn dweud bod dilyn llwyddiant Cymru ym mhencampwriaeth Euro 2016 yn Ffrainc "yn ddi-os" yn un o'r uchafbwyntiau.

Enillodd wobr Gohebydd Newyddion Teledu'r Flwyddyn yn 1997, Personoliaeth Radio'r Flwyddyn yn yr Ŵyl Gyfryngau Celtaidd yn 2009, ac eleni roedd yn aelod o'r tîm enillodd wobr am y Rhaglen Newyddion a Materion Cyfoes Orau yng Ngwobrau Cyfryngau Cymru.

Mae Dylan a'i wraig Elen yn byw yn Ninbych. Yn dad i chwech o blant - Lois, Gruff, Rhys, Sara, Ianto ac Alys - mae'n ymfalchïo bod "y rhan fwyaf ohonynt yn gefnogwyr Leeds United erbyn hyn!".