Y Gynghrair Genedlaethol: Dover Athletic 2-1 Wrecsam

Mark Harris, sydd ar fenthyg am y tymor o Gaerdydd, sgoriodd unig gôl Wrecsam

Mae Wrecsam wedi cael prynhawn i'w gofio am y rhesymau anghywir ddydd Sadwrn wedi eu hymweliad â Dover.

Bu'n rhaid gohirio'r gic gyntaf am hanner awr yn y lle cyntaf wedi i draffig achosi i'r tîm gyrraedd yn hwyr.

Roedd pethau'n edrych yn addawol pan sgoriodd Mark Harris i roi Wrecsam ar y blaen wedi 36 o funudau.

Ond o fewn munudau cyn diwedd yr hanner cyntaf fe gafodd Bobby Grant ei hel o'r maes ar ôl cael cerdyn coch dros ffrwgwd oddi ar y bêl gyda golwr Dover, Lee Worgan.

Daeth peniad Ricky Modeste wedi 72 o funudau â'r ddau dîm yn gyfartal ond yna fe rwydodd Shaun Pearson i'w gôl ei hun yn y funud olaf gan sicrhau buddugoliaeth gyntaf y tymor i'r tîm cartref.