Apêl heddlu wedi anaf difrifol i ddyn 53 oed yn Llanelli

Mae dyn 53 oed wedi cael ei gludo i'r ysbyty mewn cyflwr difrifol wedi digwyddiad ger goleuadau traffig yn Llanelli nos Sadwrn.

Yn ôl Heddlu Dyfed-Powys, roedd nifer o bobl yn rhan o'r digwyddiad a ddaeth â thraffig i stop ger cyffordd yn ardal Pemberton y dref.

Mae tri dyn wedi cael eu harestio ar amheuaeth o achos niwed corfforol difrifol.

Mae'r dyn a gafodd ei anafu yn cael ei drin yn Ysbyty Athrofaol Cymru, yng Nghaerdydd, wedi'r digwyddiad tua 20:00 ger parc manwerthu brysur.

Dywed yr heddlu nad oes amheuaeth bod unrhyw arfau wedi cael eu defnyddio.

Wrth apelio am wybodaeth a lluniau dashcam all helpu'r ymchwiliad i'r achos, dywed y llu bod hi'n bosib bod nifer o yrwyr yn yr ardal ar y pryd a fyddai wedi gorfod gyrru oddi yna i osgoi'r sefyllfa.