Dod o hyd i gorff dyn mewn afon ger Llanidloes

Cafodd Malcolm Brookes ei weld diwethaf ar 19 Awst

Mae corff dyn wedi cael ei ganfod mewn afon ger Llanidloes.

Daw'r canfyddiad wrth i'r heddlu chwilio am Malcolm Brookes, sydd wedi bod ar goll ers dechrau'r wythnos.

Mae Heddlu Dyfed Powys yn dweud nad yw'r corff wedi ei adnabod yn ffurfiol eto, ond mae'r teulu wedi cael gwybod.

Cafodd Mr Brookes ei weld diwethaf yn cerdded yng nghanol tref Llanidloes ddydd Llun, 19 Awst.

Mae swyddogion yn gofyn i unrhyw un sydd â gwybodaeth allai eu helpu i gysylltu â nhw drwy ffonio 101.