Dyn, 58, wedi marw ar safle ailgylchu yng Nghaerdydd

Mae dyn wedi marw yn dilyn gwrthdrawiad ar safle ailgylchu yng Nghaerdydd brynhawn Mercher.

Cadarnhaodd Heddlu De Cymru bod dyn 58 oed o'r Barri wedi marw ar ôl y digwyddiad yn Atlantic Waste Recycling yn Nhredelerch.

Cafodd y gwasanaethau brys eu galw i'r digwyddiad am tua 16:30 wedi adroddiadau o wrthdrawiad rhwng gweithiwr a pheiriant.

Dywedodd Atlantic Waste Recycling bod ymchwiliad i "ddigwyddiad difrifol" wedi dechrau ac felly na fyddai'n briodol gwneud sylw pellach.

Mae'r heddlu yn ymchwilio ar y cyd â'r Gweithgor Iechyd a Diogelwch, a dywedon nhw nad oes unrhyw un wedi ei arestio.