Marwolaeth Wrecsam: Dyn yn gwadu cyhuddiad o ddynladdiad

Dywed datganiad teulu Philip James Long ei fod yn ŵr annwyl i'w wraig Hayley

Mae dyn 18 oed wedi pledio'n ddieuog i gyhuddiad o ddynladdiad yn dilyn marwolaeth dyn arall yng nghanol Wrecsam fis diwethaf.

Roedd Philip James Long, 36 oed o Marchwiel, yn briod ac yn dad i bedwar o fechgyn.

Cafwyd hyd iddo'n anymwybodol yn Stryd y Coleg wedi i'r heddlu gael eu galw yno tua 01:40 fore Sul, 4 Awst. Bu farw ar ôl cael ei gludo i'r ysbyty yn Stoke.

Yn Llys y Goron Yr Wyddgrug ddydd Gwener, fe blediodd Matthew Curtis, o ardal Gwersyllt, yn ddieuog i ddynladdiad.

Cafodd ei gadw yn y ddalfa nes yr achos llys, sydd i ddechrau ar 20 Ionawr.