Galw am gynigion i godi melinau gwynt yn y gogledd

Mae 160 o felinau ar safle Gwynt y Môr oddi ar arfordir y gogledd

Gall ragor o felinau gwynt gael eu hadeiladu oddi ar arfordir gogledd Cymru, wrth i Ystadau'r Goron alw ar gwmnïau i wneud cynigion i ddatblygu'r safle.

Mae'r cynllun yn rhan o bedwar man ar draws Prydain sy'n cael eu cynnig i ddatblygu melinau gwynt, wrth i'r llywodraeth geisio mynd i'r afael â chynnydd lefelau carbon.

Mae'r ardal rhwng dwyrain Ynys Môn a Bae Lerpwl eisoes yn gartref i dros 200 o felinau, ond yn ôl un ymgyrchydd byddai'n protestio i wrthwynebu rhagor.

Mae Cyngor Ynys Môn wedi ei ddisgrifio fel "cyfle enfawr".

• Agor fferm wynt fwya Cymru

• Buddsoddi £4.5m yn sector ynni'r môr

Pe bai'r ceisiadau'n llwyddiannus gallai'r cwmnïau ennill hawliau dros dir gwely'r môr erbyn 2021, gyda melinau gwynt yn weithredol erbyn diwedd y ddegawd nesaf.

Y Deyrnas Unedig sy'n cynhyrchu'r cyfanswm mwyaf o egni drwy felinau gwynt morol ar draws y byd ac yn ôl Ystadau'r Goron mae arfordiroedd y wlad yn cynnig yr amgylchiadau perffaith i ddatblygu mwy, gyda dŵr bas a gwyntoedd cyson.

Pe bai ceisiadau ar draws y pedwar safle Prydeinig yn llwyddo mae potensial i bweru dros chwe miliwn o dai.

'Gwarthus'

Ond nid pawb sy'n cytuno gyda'r syniad.

Pan adeiladwyd 160 o felinau ar safle Gwynt y Môr oddi ar arfordir y gogledd yn 2013 fe brotestiodd John Lawson-Reay yn erbyn y datblygiad.

Dywedodd John Lawson-Reay y byddai rhagor o felinau gwynt yn "fandaliaeth"

Yn byw yn Llandudno, fe ddywedodd y gall y grŵp y mae'n rhan ohono - Save our Scenery - ailffurfio i wrthwynebu'r ceisiadau.

"Mae o am effeithio ar ein twristiaeth. Yr hyn da ni'n ei gynnig ydy llefydd prydferth gweledol. Fandaliaeth ydy o," meddai.

"Gallwch chi eu rhoi nhw yng nghanol Môr y Gogledd ond nid yn y fan hyn. Mae'n warthus."

Cyfle am swyddi?

Tra bod Mr Lawson-Reay yn ei wrthwynebu, yn ôl Carwyn Jones o Gyngor Môn mae'n "gyfle gwych".

"Fel Ynys Ynni 'da ni'n croesawu hyn," meddai.

"Os ydy'r Deyrnas Unedig am gyrraedd y targed o allyriadau net zero carbon erbyn 2050 mae rhaid cael ynni gwynt felly 'da ni'n gefnogol.

"Hefyd mae 'na bwysau mawr gan bobl ifanc, a dylwn ni eu cefnogi a gwneud hynny ar gyfer cenedlaethau'r dyfodol."

Dywedodd y Cynghorydd Carwyn Jones y byddai'r melinau gwynt yn "gyfle gwych"

Ychwanegodd y gallai'r safle gynnig gwaith i rai o'r ynys a llenwi rhan o'r bwlch ar ôl i gynllun atomfa Wylfa Newydd gael ei ohirio.

Yn ôl Ystadau'r Goron mae cyfle i archwilio unrhyw rai sy'n awyddus i wneud cais a cheisio dod o hyd i ardaloedd a chynigion addas.