Cwpan Rygbi'r Byd: Cymru 35-13 Uruguay

Gareth Davies sgoriodd pumed a chais olaf Cymru

Roedd yna fuddugoliaeth i Gymru a phwynt bonws yn Kumamoto ond roedd Warren Gatland ychydig yn siomedig gyda pherfformiad ei dîm yn erbyn Uruguay.

Gyda 13 newid i'r tîm drechodd Fiji, roedd nifer o chwaraewr am brofi pwynt i'r hyfforddwr ac fe ddechreuodd Cymru yn gryf yn ôl y disgwyl.

Er y sgôr, sy'n sicrhau mai nhw sy'n gorffen ar frig y grŵp ac yn wynebu Ffrainc yn yr wyth olaf, roedd yna nifer o wallau o'r dwylo.

Cyn i'r chwarae ddechrau dydd Sul, roedd munud o dawelwch yn y stadiwm i gofio am y sawl sydd wedi colli eu bywydau yn sgil teiffŵn Hagibis.

Ar ôl y gêm dywedodd Gatland: "Rwy'n hapus o ennill pedair allan o bedair ond ddim yn rhy hapus gyda 'chydig o heno - sâl ar adegau a cholli'r bêl gormod o weithiau.

"Fe wnaethom fethu pedwar neu bump o gyfleoedd ond fe wnaethom ddangos ychydig o gymeriad.

"O bosib wnaethom ni ddim rhoi digon o ymdrech i gadw'r bêl, yn yr ail hanner roeddem yn fwy uniongyrchol gan ennill yr hawl i chwarae."

'Creadigol'

Daeth y cais cyntaf wedi 16 munud, blaenwyr Cymru yn mynd trwy deg cymal o'r chwarae cyn i'r prop Nicky Smith groesi.

Er i Gymru reoli'r gêm a'r tiriogaeth ni wnaeth amddiffyn y gwrthwynebwyr wegian dan y pwysau.

Roedd yna fflachiau creadigol gan Gymru ond tarodd Uruguay yn ôl gyda chic gosb gan Felipe Berchesi wrth i Gymru gamsefyll.

Gydag Uruguay dan bwysau, tro olwyr Cymru oedd hi i geisio creu argraff.

Fe wnaeth bylchiad gan Josh Adams greu cyfle i Hallam Amos groesi, ond yn anffodus roedd pas Hadleigh Parkes i Amos ymlaen.

Er i Hallom Amos groesi'r llinell deirgwaith - ni chafodd gais

Daeth cic gosb arall i Felipe Berchesi i roi Uruguay o fewn pwynt i Gymru, mewn hanner wnaeth brofi'n rhwystredig ac yn llawn gwallau gyda'r dwylo.

Roedd yna well disgyblaeth gan Gymru wedi'r hanner.

O'r cychwyn fe wnaeth y blaenwyr roi pwysau mawr ar linell y gwrthwynebwyr gyda Adam Beard yn mynd yn agos, dim ond i'r amddiffyn gadw'n gadarn wrth y pyst,

Cerdyn melyn

O'r symudiad daeth y bêl i'r asgell gyda Josh Adams yn croesi o bas Rhys Patchell.

Gyda Chymru yn dangos gwell disgyblaeth, daeth cyfle eto ar yr asgell ac fe groesodd Amos - unwaith eto roedd pas olaf Parks ymlaen.

Parhau i bwyso wnaeth Cymru, ac fe gafodd Santiago Civetta gerdyn melyn am droseddu cyson.

Daeth cais gosb i Gymru funudau wedyn, wrth i Uruguay gael eu cosbi am gwympo'r sgarmes rydd.

Josh Adams yn croesi am gais cyntaf Cymru

Tomos Williams gyda chais rhif pedwar i Gymru

Doedd ymdrechion Uruguay ddim ar ben, ac ar ôl eu cyfnod gorau o bwyso, daeth cais i'r prop German Kessler i leihau'r bwlch i wyth pwynt.

Ond yna daeth cais arall i Gymru, bwlch gan Halfpenny, gyda Tomos Williams ddaeth i'r cae yn lle Aled Davies yn croesi o bump metr i wneud y gêm yn gwbl ddiogel.

A daeth un cais arall, gyda Gareth Davies yn chwarae ar yr asgell, yn pigo'r bêl o'r llawr o gic rydd gan redeg hanner hyd y cae i sgorio.