Cyn-reolwr cartrefi plant yn euog o gam-drin hanesyddol

Mae dyn 78 oed wedi ei gael yn euog o droseddau rhyw hanesyddol yn erbyn bechgyn oedd yn ei ofal.

Penderfynodd rheithgor fod John Allen yn euog o wyth o droseddau yn erbyn pum bachgen, yr ieuengaf yn 13 ar y pryd.

Mae Allen, cyn-reolwr cartrefi plant yn y gogledd, eisoes yng nghanol dedfryd carchar am oes am gam-drin plant.

Fe fydd yn cael ei ddedfrydu ar 8 Ionawr.

Cafodd ei ddisgrifio yn y llys fel pedoffeil rheibus.

Roedd Allen, oedd yn gyfrifol am gartrefi Bryn Alyn yn ardal Wrecsam, wedi gwadu 20 o gyhuddiadau'n ymwneud ag wyth o fechgyn dan ei ofal rhwng 1976 a 1992.

Eisoes yn y carchar

Clywodd Llys y Goron Yr Wyddgrug ei fod wedi ei gael yn euog ddwywaith yn barod mewn llys am gam-drin plant.

Yn 2014 cafodd ei garcharu am o leiaf 11 mlynedd am 33 o droseddau rhyw.

Fe wnaeth pob un o'r dioddefwr heblaw am un yn yr achos presennol roi tystiolaeth ar ôl i Allen gael ei ddyfarnu yn euog yn 2014.

Roedd Allen wedi pledio'n ddieuog i 16 o gyhuddiadau o ymosod yn anweddus, dau gyhuddiad o weithredoedd rhyw anghyfreithlon, a dau o geisio cyflawni gweithredoedd rhyw eraill.

Clywodd y rheithgor gyfweliad gydag achwynydd, sydd bellach yn ei 50au, ddywedodd ei fod wedi cael ei lusgo i swyddfa Allen yn dilyn sgarmes a'i ddal yn sownd i'r llawr.

Dywedodd mai'r peth nesaf mae'n ei gofio yw Allen yn rhwygo'i ddillad oddi arno cyn ymosod yn rhywiol arno.