Gwobr genedlaethol i fardd ifanc o Ferthyr Tudful

Morgan Owen, 25, yw enillydd cyntaf categori newydd am farddoniaeth mewn ieithoedd Celtaidd

Pan gafodd y casgliad cyntaf o gerddi Morgan Owen ei gyhoeddi ym mis Gorffennaf eleni, go brin ei fod wedi disgwyl ennill gwobr cenedlaethol o fewn chwe mis.

Ond mae 'moroedd/dŵr' - pamffled cysyniadol o gerddi gan y bardd 25 oed o Ferthyr Tudful - wedi dod i'r brig mewn cystadleuaeth trwy Ynysoedd Prydain.

Morgan Owen yw enillydd cyntaf categori newydd am farddoniaeth mewn ieithoedd Celtaidd yng Ngwobrau Barddoniaeth Michael Marks, a noddir gan Ymddiriedolaeth Wordsworth.

Derbyniodd y bardd ei wobr mewn noson arbennig yn y Llyfrgell Brydeinig yn Llundain, lle anrhydeddwyd awduron, cyhoeddwyr ac artistiaid sy'n ymwneud â chyhoeddi pamffledi barddoniaeth.

Cafodd y gyfrol ei lansio yn ystod Gŵyl Arall yng Nghaernarfon ym mis Gorffennaf eleni.

Beirniaid y wobr Geltaidd oedd Dafydd John Pritchard, David Wheatley ac Aonghas Pàdraig Caimbeul.

Yn 2018, roedd Morgan yn un o'r pedwar bardd fu'n rhan o Her 100 Cerdd Llenyddiaeth Cymru.

Ers cyhoeddi 'moroedd/dŵr', mae ail gyfrol - Bedwen ar y lloer - hefyd wedi ei chyhoeddi ym mis Hydref.

Yn sgil ei lwyddiant, bydd Morgan yn derbyn gwobr ariannol o £2,000 a chyfle i dreulio cyfnod fel bardd preswyl mewn digwyddiad yng ngwlad Groeg.

'Tipyn o anrhydedd'

Wedi iddo dderbyn ei wobr, dywedodd Morgan mai "llawenydd deublyg" oedd ennill.

"Yn gyntaf," meddai, "gwefr bur yw gweld fy ngwaith yn cael ei gydnabod yn y fath fodd. Mae'n dipyn o anrhydedd.

"Yn ail, rwy'n falch iawn bod gwasg annibynnol flaengar, sef Cyhoeddiadau'r Stamp, yn derbyn cydnabyddiaeth trwy'r wobr hon hefyd. Dyma goron ar gydweithio dedwydd iawn."

Aeth ymlaen i ganmol y ffaith bod Gwobrau Michael Marks wedi sefydlu'r wobr hon yn benodol ar gyfer barddoniaeth yn yr ieithoedd Celtaidd.

"Dyma gam arloesol a beiddgar, ac rwy'n falch bod ein llenyddiaeth ninnau yn cael ei hanrhydeddu fel hyn."