Heddlu yn atal ymddygiad gwrthgymdeithasol yng Nghaernarfon

Mae'r gorchymyn mewn grym tan nos Sul

Dywed Heddlu Gogledd Cymru bod gorchymyn gwasgaru mewn grym yng Nghaernarfon er mwyn delio ag ymddygiad gwrthgymdeithasol.

Daeth y gorchymyn i rym nos Wener ac mae'n para tan nos Sul.

Mewn neges ar y cyfryngau cymdeithasol nos Wener dywedodd Heddlu Gogledd Cymru: "I dargedu grwpiau o bobl ifanc sy'n ymddwyn mewn modd annerbyniol a gwrthgymdeithasol yn y dref (Caernarfon) rydym wedi cyhoeddi gorchymyn a fydd yn aros yn ei le trwy gydol y penwythnos - yn rhedeg am 48 awr o nos Wener 3 Ionawr, ymlaen tan nos Sul, 5 Ionawr."

Roedd y neges hefyd yn "apelio ar rieni yng Nghaernarfon i feddwl yn ofalus am ble mae'ch plant dros y penwythnos" ac yn apelio ar y cyhoedd i "helpu'r heddlu i atal troseddu ac i amddiffyn trigolion lleol."

Fe ddaw'r rhybudd wythnos wedi i siop bwyd cyflym yn y dre wahardd pobl ifanc oni bai eu bod yng nghwmni oedolyn.

Ym Mai 2018 fe osododd yr heddlu orchymyn gwasgaru yng Nghaernarfon wedi i bobl ifanc ddechrau dringo ar doeau am hwyl.

Mae gorchymyn gwasgaru yn rhoi hawl i'r heddlu allu gorfodi unrhyw un sy'n cael ei amau o droseddu i adael yr ardal am hyd at 48 awr.

'Mater i'r Cyngor'

Wrth gael ei holi gan Cymru Fyw dywedodd Maer Caernarfon, y Cynghorydd Tudor Owen, ei fod "yn siomedig o glywed am y gorchymyn.

"Dwi'n gobeithio gweld y clerc fore Llun fel bod y mater yn cael ei drafod gan y Cyngor yn fuan.

"Mae angen iddo fod yn fater brys ar yr agenda - dwi'n teimlo bod yna dipyn i bobl ifanc 'neud yn y dre. Mae 'na glybiau ieuenctid a sinema gyffrous yn Galeri ond efallai bod angen gwneud mwy."