Tân Ffair-rhos: Teulu'n diolch i'r cyhoedd am gefnogaeth

Bu farw Zac (chwith) yn y digwyddiad, ac mae ei frawd Harley mewn cyflwr difrifol

Mae teulu bachgen fu farw yn dilyn tân mewn carafán yng Ngheredigion wedi diolch i'r cyhoedd am eu cefnogaeth.

Cafodd yr heddlu eu galw am 05:35 fore Sul yn dweud fod tân mewn carafán yn Ffair-rhos, ger Pontrhydfendigaid.

Bu farw Zac, tair oed, yn y tân ac fe gafodd ei dad, Shaun Harvey, a'i frawd pedair oed, Harley, eu cludo i Ysbyty Bronglais, Aberystwyth ar ôl cael "llosgiadau difrifol".

Mae'r heddlu'n dweud nad ydyn nhw'n trin y digwyddiad fel un amheus.

'Geiriau caredig'

Mewn datganiad brynhawn dydd Llun, dywedodd y teulu: "Fe hoffem ddiolch i bawb am eu geiriau caredig a'u cefnogaeth.

"Rydym yn diolch i chi am barchu ein preifatrwydd i'r dyfodol tra rydym yn galaru colli Zac ac yn canolbwyntio ar ein mab Harley sydd yn parhau i fod yn ddifrifol wael."

Dywedodd Heddlu Dyfed-Powys mewn datganiad: "Mae ymchwiliwyr heddlu a thân yn parhau i archwilio'r safle ond dyw'r amgylchiadau ddim yn cael eu trin fel rhai amheus ar hyn o bryd.

"Mae swyddogion arbenigol yn cefnogi'r teulu ar y cyfnod trawmatig hwn."

Mewn datganiad, dywedodd Cyngor Ceredigion bod ei "gydymdeimlad dwys gyda'r teulu yn dilyn y digwyddiad trasig yn Ffair-rhos", a bod swyddogion yn "gweithio gyda Heddlu Dyfed-Powys ac yn rhoi cymorth i'r teulu a'r ysgol ar yr adeg anodd yma".