Darlithydd o Gaerdydd methu gadael China oherwydd feirws

Dydy Dr Yvonne Griffiths ddim yn gallu gadel Wuhan yn China ohewrydd yr argyfwng coronafeirws

Mae darlithydd sy'n byw yng Nghaerdydd wedi clywed na fydd hi'n medru gadael Wuhan yn China sydd yn ganolbwynt i'r argyfwng coronafeirws os na fydd Llywodraeth y DU yn ymyrryd.

Mae Dr Yvonne Griffiths, 71, o Y Ddraenen (Thornhill) yng ngogledd y ddinas, wedi bod yn Wuhan am dair wythnos gyda dau gydweithiwr o Brifysgol Dinas Birmingham.

Roedd hi i fod i hedfan adref ddydd Llun ond mae ei hediad wedi ei ganslo.

Mae'r feirws wedi lladd mwy na 50 o bobl a heintio miloedd.

Mae Llywodraeth y DU yn dweud eu bod yn parhau i adolygu'r sefyllfa. Mae'r Swyddfa Dramor yn cynghori pobl i beidio teithio i dalaith Hubei.

'Cyngor hurt'

Yn ôl Bethan Webber, merch Dr Griffiths, yr unig obaith i'w mam bellach ydy i Lywodraeth y DU anfon awyren yno i'w nôl.

"Mae cyngor y Swyddfa Dramor yn hurt. Maen nhw'n dweud wrth bawb am adael ond yn y frawddeg nesaf maen nhw yn dweud fod popeth wedi cau," meddai.

Ychwanegodd: "Mae hi'n teimlo fel bod pobl Prydain yn cael eu gadael i ddatrys y sefyllfa eu hunain yn yr argyfwng yma."

Dywedodd Ms Webber bod ei mam yn dechrau poeni mwy am ledaeniad y feirws.

"Mae 'na negeseuon cymysg am y mygydau a pha mor effeithiol ydyn nhw.

"Mae hynny yn ychwanegu at yr ansicrwydd ac mae hi'n fwy brawychus os ydych chi'n meddwl eich bod chi yn mynd i gael eich diogelu trwy wisgo masg ac yna'n sydyn mae pawb yn dweud falle nad y'n nhw mor effeithiol."

Mae rhai yn amau effeithlonrwydd y mygydau erbyn hyn

Mae Dr Griffiths wedi dweud wrth y BBC ei bod hi'n ddiogel a bod y gwesty yn gyfforddus a bod yno ddigon o fwyd.

Dywedodd y Swyddfa Dramor eu bod yn monitro'r sefyllfa yn China yn "agos" ac maen nhw'n cynghori pobl i beidio teithio i dalaith Hubei.

Ychwanegodd llefarydd: "Ry'n ni wedi diweddaru ein cyngor i deithwyr ac ry'n ni yn dal i adolygu'r sefyllfa.

"Mae ein staff yn swyddfa'r conswl yn barod i helpu unrhyw un o Brydain sydd angen help."