Cadarnhad y bydd newid yng ngeiriad cwestiwn Cyfrifiad

Bydd y Cyfrifiad y flwyddyn nesaf yn cydnabod pobl ddu neu Asiaidd sy'n disgrifio eu hunain fel Cymry.

Roedd yna bryderon bod y ffurflen ddrafft yn anwybyddu lleiafrifoedd ethnig yng Nghymru trwy beidio â rhoi'r opsiwn i unigolion ddatgan eu bod yn Gymro neu'n Gymraes.

Ond mae Llywodraeth Cymru wedi cadarnhau bellach y bydd y termau "Asiaidd Cymreig" a "Du Cymreig" wedi'u cynnwys ar y ffurflen.

• Ystyried newid geiriad cwestiwn Cyfrifiad 2021

• Newid yr Arolwg Cenedlaethol rhag 'anghofio' lleiafrifoedd

• Cyfrifiad yn 'anghofio' Cymry o gefndir ethnig lleiafrifol

Daw'r tro pedol, medd llefarydd, wedi "trafodaethau adeiladol gyda'r Swyddfa Ystadegau Gwladol a chyfres o brofion ynghylch cwestiwn ethnigrwydd y Cyfrifiad".

Ychwanegodd fod y Swyddfa Ystadegau Gwladol "wedi argymell bod holiadur y Cyfrifiad yng Nghymru yn cynnwys y termau 'Asiaidd Cymreig' a 'Du Cymreig' yn y disgrifiadau lefel-uchel, ynghyd ag 'Asiaidd Prydeinig' a 'Du Prydeinig' yn y cwestiwn grŵp ethnig".

"Bydd y newid yma'n cael ei adlewyrchu yn holiadur Cyfrifiad 2021 yng Nghymru," meddai.