Merch, 2, mewn cyflwr difrifol wedi gwrthdrawiad yn Sir Gâr

Mae merch dwy oed mewn cyflwr difrifol ar ôl gwrthdrawiad ar dir preifat yn Sir Gâr.

Dywed Heddlu Dyfed-Powys fod y gwrthdrawiad wedi digwydd tua 12:10 ddydd Llun yn ardal Dre-fach, ger Cross Hands.

Cafodd tri o gerbydau'r gwasanaeth ambiwlans eu hanfon i'r digwyddiad.

Cafodd y ferch ei chludo mewn ambiwlans awyr i'r Ysbyty Athrofaol yng Nghaerdydd.

Dywed yr heddlu fod swyddogion arbenigol yn cefnogi'r teulu.

Cafodd ffordd gyhoeddus gyferbyn â'r safle ei chau tan tua 15:15 ddydd Llun.