Galw am drwsio ffordd brysur yn Sir Ddinbych

Un o'r tyllau ar ffordd y B5105

Mae 'na alwadau ar Gyngor Sir Ddinbych i fynd ati ar frys i drwsio ffordd y B5105 ger Clawddnewydd oherwydd yr holl dyllau sydd ynddi.

Dywed gyrwyr eu bod wedi cael pynctiars dirifedi ac mae 'na ofnau y bydd damweiniau difrifol wrth i bobl osgoi'r tyllau.

'Dyw llenwi'r tyllau ddim yn ddigon da, yn ôl pobl leol - maen nhw'n galw am roi tarmac ar y ffordd.

Mae traffig cyson yn teithio ar y ffordd rhwng Rhuthun a Cherrigydrudion ac mae nifer o yrwyr yn cwyno am y tyllau mawr ar ddarn hir o'r ffordd ger Clawddnewydd.

Mae Cyngor Sir Ddinbych wedi dweud y byddan nhw'n rhoi wyneb newydd ar y ffordd fis nesaf.

Un sydd wedi cael digon yw Ynyr Humphreys o Gerrigydrudion - bu'n rhaid iddo brynu teiar newydd am £250 yn ddiweddar ac aloi newydd ar ôl difrod.

Dywedodd: "Mae cyflwr y ffordd yn gywilydd... o'n i ar y ffordd i gwrs efo gwaith a chyrraedd Lerpwl a gweld bod 'na grac yn yr aloi a pynctiar.

"Pot holes yn y ffordd yn ochra Rhuthun oedd wedi achosi'r difrod."

Roedd Alun Jones yn credu bod ei olwyn ei gar wedi dod ffwrdd

Un arall sydd wedi cael digon ydy Alun Jones, hefyd o Gerrigydrudion.

"Mae hi'n ddifrifol… potholes yn bob man arni. Hities i un pothole ac mi fu'n rhaid i mi stopio oherwydd roeddwn i'n meddwl bod yr olwyn wedi dod ffwrdd, ond lwcus i mi doedd hi ddim," meddai.

Mae'r cyngor wedi bod yn llenwi rhai tyllau dros y dyddiau diwethaf ond mae trigolion lleol yn galw arnyn nhw i ailosod wyneb y ffordd sydd wedi cael ei effeithio gan y tyllau i gael ateb tymor hir i'r broblem.

'Gwaith yn dechrau fis Ebrill'

Dywedodd Llyr Gruffydd sy'n aelod Plaid Cymru dros Ogledd Cymru yn y Cynulliad bod "rhywun yn deall pam bod yn rhaid patsio bob hyn a hyn.

"Ond mae cyflwr y ffordd fel ag y mae yn golygu bod atebion dros dro ddim yn ddigon da, ac mae'r amser wedi dod nawr i flaenoriaethu… nid dim ond y ffyrdd prysuraf ond y ffyrdd perycla', ac mae hon yn sicr ymhlith y rheiny."

Dywedodd llefarydd ar ran Cyngor Sir Ddinbych eu bod nhw'n ymwybodol o broblemau efo tyllau yn y ffordd a'u bod nhw'n ceisio sicrhau bod gwaith cynnal a chadw'n digwydd.

Maen nhw hefyd yn dweud eu bod nhw'n bwriadu arwynebu'r ffordd mewn amryw o leoliadau dros y misoedd nesaf, gyda'r gwaith yn cychwyn ym mis Ebrill.