Cynghorau ar eu colled £30m y mis achos coronafeirws

Cychwynnodd Andrew Morgan yn ei swydd ym mis Rhagfyr 2019

Mae cynghorau lleol ar eu colled mwy na £30m y mis mewn incwm o achos y coronafeirws medd arweinydd Llywodraeth Leol Cymru.

Dywedodd Andrew Morgan bod yr effaith ar gynghorau wedi bod yn "enfawr".

Mae Llywodraeth y Deyrnas Unedig wedi cyhoeddi arian ychwanegol i gynghorau Lloegr ac yn dweud y bydd Llywodraeth Cymru o ganlyniad yn cael £95m.

Croesawu'r arian wnaeth Llywodraeth Cymru gan ddweud y byddai yn ei ddefnyddio i gefnogi gwasanaethau cyhoeddus a busnesau.

Pan mae Llywodraeth y DU yn dweud y byddan nhw yn rhoi arian i lywodraethau datganoledig, fel y cyhoeddiad ddydd Sadwrn, mae'n cyrraedd trwy fformiwla Barnett.

Penderfyniad gweinidogion Cymru yw hi ynglŷn â sut mae'r nawdd yn cael ei wario.

• LLIF BYW: Y newyddion diweddaraf ar 18 Ebrill

• CANLLAW: Beth ddyliwn i ei wneud?

• AMSERLEN: Effaith haint coronafeirws yng Nghymru

• IECHYD MEDDWL: Tips gan Dr Ioan Rees

• DYSGU: Sut i gadw'r plant yn brysur gartref

Dywed Andrew Morgan, arweinydd Cyngor Rhondda Cynon Taf bod cynghorau mewn amgylchiadau arferol yn cael arian trwy bethau fel eu theatrau, canolfannau hamdden, incwm parcio a llogi adeiladau.

Mae hyn heb ystyried hefyd trethi cyngor a threthi busnes sydd wedi eu gohirio dros dro.

Wrth groesawu'r cyhoeddiad gan Lywodraeth y DU mae'n dweud efallai y bydd angen mwy o arian yn y dyfodol.

Mae penderfyniad Llywodraeth Cymru i roi blaendal efo'u grantiau wedi helpu sefyllfa'r coffrau meddai.

"Er hynny ar ddiwedd yr argyfwng yma neu ar ddiwedd y flwyddyn ariannol fe fydd yna dwll yn ein nawdd os nad oes yna fwy o arian yn cyrraedd," meddai.

Mae pobl wedi bod yn gorfod gwneud ymarfer corff tu allan yn ystod yr argyfwng gan olygu bod canolfannau hamdden y cynghorau yn colli arian

Ychwanegodd bod Llywodraeth Cymru yn cydnabod hyn a'u bod ar y cyd wedi bod yn galw ar Lywodraeth y DU i roi mwy o arian i gynghorau.

Wrth gyhoeddi'r arian ychwanegol i Gymru dywedodd Ysgrifennydd Cymru, Simon Hart: "Mae Llywodraeth y DU yn parhau i gefnogi Llywodraeth Cymru, yn darparu nawdd iddynt gwrdd â'r heriau eithriadol."

Ychwanegodd bod y llywodraeth yn parhau i wneud "beth bynnag sydd angen i sicrhau bod pawb yng Nghymru yn cael mynediad i'r cymorth maent angen."

Dywedodd llefarydd ar gyfer Llywodraeth Cymru eu bod yn "amlwg yn croesawu'r nawdd ychwanegol" ac y bydd yr arian yn cael ei ddefnyddio i gefnogi gwasanaethau cyhoeddus a busnesau.

Ychwanegodd y llefarydd eu bod wedi clustnodi £110 miliwn o arian ychwanegol i lywodraeth leol.