'Dim achosion newydd o Covid-19' mewn rhai ardaloedd

Mae bron bob awdurdod lleol yng Nghymru yn adrodd niferoedd bychan o achosion positif o Covid-19 bellach, gyda dim achosion newydd mewn nifer, yn ôl pennaeth GIG Cymru.

Yn siarad yng nghynhadledd ddyddiol Llywodraeth Cymru ddydd Iau dywedodd Dr Andrew Goodall: "Mae nifer yr achosion newydd wedi bod yn gostwng yn gyson ers Ebrill, er ein bod yn gwneud llawer mwy o brofion.

"Mae cyfradd y profion positif wedi gostwng i lai na 2%."

Ond cyfaddefodd prif weithredwr GIG Cymru bod rhai ardaloedd yn parhau i weld mwy o achosion newydd, fel rhai ardaloedd Bwrdd Iechyd Betsi Cadwaladr.

"Ar hyn o bryd mae nifer yr achosion dyddiol ar eu huchaf yng ngogledd Cymru," meddai Dr Goodall.

885 claf Covid-19 mewn ysbytai

Ers dechrau Mehefin mae llai na 10 o gleifion wedi marw ar ôl cael prawf positif pob dydd.

"Mae nifer y bobl sy'n marw o coronafeirws wedi bod yn gostwng ers dechrau Ebrill," meddai Dr Goodall wrth y gynhadledd.

• LLIF BYW: Y newyddion diweddaraf ar 11 Mehefin

• CANLLAW: Rhif R: Beth ydy o a pham ei fod yn bwysig

• AMSERLEN: Llinell amser coronafeirws yng Nghymru

• Y GIG: Sâl? Mae'r GIG 'dal ar agor' er gwaethaf y pandemig

• IECHYD MEDDWL: Claf cyntaf Cymru'n annog positifrwydd

Dywedodd Dr Goodhall bod 885 o gleifion coronaferws mewn ysbytai yng Nghymru, a bod hynny'n ostyngiad ar yr wythnos ddiwethaf.

"Er bod hyn yn is mae'n dal yn cyfateb i dri ysbyty mawr yn llawn cleifion Covid-19," meddai.

Ychwanegodd bod 32 o gleifion coronafeirws yn cael triniaeth mewn unedau gofal critigol - y nifer lleiaf ers 25 Mawrth.

Ond dywedodd Dr Goodall nad yw mwyafrif y rheiny sydd wedi cael Covid-19 wedi bod angen triniaeth ysbyty.

Pryder yn parhau am ail don

Er y gostyngiad yn nifer yr achosion newydd, dywedodd bod angen parhau i fod yn bwyllog o ran llacio'r cyfyngiadau er mwyn sicrhau bod modd i'r GIG ateb y galw.

"Rwy'n bryderus am y posibilrwydd o weld ail don, pryd bynnag allai hynny fod," meddai.

Ond ychwanegodd y bydd y GIG yn barod oherwydd y gwaith paratoi sydd eisoes wedi'i wneud, a bod y gwasanaeth iechyd bellach "wedi dysgu llawer mwy am y feirws".

Bydd cleifion sydd wedi cael problemau yn ystod y cyfnod clo yn cael blaenoriaeth gan ddeintyddion

Dywedodd Dr Goodall hefyd y bydd mwy o ofal deintyddol ar gael i gleifion o 1 Gorffennaf.

Cleifion sydd wedi cael problemau yn ystod y cyfnod clo fydd yn cael blaenoriaeth, meddai.

Ychwanegodd bod angen bod yn bwyllog wrth ailagor y gwasanaethau hynny hefyd, ac mai dim ond apwyntiadau brys fydd yna i ddechrau.