Heddlu'n chwilio am ddynes a phlentyn sydd ar goll
- Cyhoeddwyd
Does neb wedi gweld y ddau ers dydd Iau
Mae'r heddlu yn apelio am wybodaeth am ddynes a phlentyn dyflwydd oed sydd wedi bod ar goll ers dydd Iau.
Cafodd y ddynes, sydd rhwng 20 a 30 oed, ei gweld ddiwethaf ar Heol y Llys yn Hwlffordd, Sir Benfro am 13:25.
Nid yw swyddogion Heddlu Dyfed-Powys wedi llwyddo i ddod o hyd iddi a bellach maen nhw'n apelio am gymorth gan y cyhoedd.
Disgrifiad yr heddlu
Mae gan y ddynes wallt brown ac roedd yn gwisgo siwmper binc a throwsus ac esgidiau du, tra roedd y bachgen yn gwisgo siaced las, jîns ac esgidiau du.
Dywedodd llefarydd ar ran yr heddlu: "Rydym wedi cynnal sawl ymholiad dros y dyddiau diwethaf wrth i swyddogion geisio dod o hyd iddi, ond nid ydynt wedi bod yn llwyddiannus."