Cyhoeddi enwau dwy fu farw mewn gwrthdrawiad

Cafodd y gwasanaethau brys eu galw i'r digwyddiad ar yr A487 toc wedi 15:30 ddydd Mercher

Mae'r heddlu wedi cyhoeddi enwau dwy fenyw fu farw mewn gwrthdrawiad yng Ngwynedd ddydd Mercher.

Roedd Nancy Roberts, 84 oed, ac Anwen Mitchelmore, 59 oed, yn fam a merch. Roedd y ddwy yn byw yn ardal Porthmadog.

Ychydig wedi 15:30 cafodd y gwasanaethau brys eu galw yn dilyn adroddiadau fod car Volkswagen Polo coch wedi bod mewn gwrthdrawiad gyda lori felen rhwng Garndolbenmaen a Phenmorfa ar ffordd yr A487.

Dywedodd y cynghorydd lleol, Nia Jeffreys fod y digwyddiad yn "sioc mawr i'r gymuned" a'i bod hi'n "anodd iawn dychmygu colli dwy genhedlaeth o'r teulu'r un pryd."

Dywedodd Nia Jeffreys bod y marwolaethau yn golled i gymuned Porthmadog

"Dynes teulu oedd Anwen uwchben pob peth arall," meddai. "Roedd hi'n meddwl y byd o'i phlant i gyd ac eu plant bach hwythau hefyd, ag oedd teulu yn ofnadwy o bwysig iddi.

"Roedd hi'n berson ofnadwy o annwyl - gwên barod bob tro roeddat ti'n gweld hi'n stryd.

"Bydd hi'n golled fawr wrth gwrs i'r teulu a 'dan ni gyd yn cydymdeimlo ag yn meddwl amdanyn nhw, ond colled i ni fel cymuned Port.

"Mae'n anodd meddwl bod ni ddim yn mynd i weld ei gwên hi eto ond byddan ni gyd yn dod at ein gilydd rŵan a rhoi pob cefnogaeth i'r teulu i gyd."

Apêl yn parhau

Dywedodd Sarjant Emlyn Hughes o Uned Blismona Ffyrdd Heddlu Gogledd Cymru eu bod yn dal i apelio am dystion i'r digwyddiad.

Ychwanegodd: "Mae ein cydymdeimlad dwysaf gyda theuluoedd y ddwy a gafodd eu lladd. Maen nhw'n derbyn cefnogaeth gan swyddogion arbenigol.

"Hoffwn ddiolch hefyd i bawb sydd wedi cysylltu gyda ni hyd yma gyda lluniau 'dash cam', ond rwy'n apelio eto ar unrhyw oedd yn teithio yn yr ardal adeg y gwrthdrawiad ond sydd heb gysylltu eto i wneud hynny cyn gynted â phosib.

"Mae'r ymchwiliad yn parhau a byddwn yn gofyn i bobl gysylltu drwy ffonio 101 a dyfynnu'r cyfeirno Y100773."