Aberystwyth: Arestio pump ar ôl 'ffrwgwd â chyllyll'
- Cyhoeddwyd
Cafodd yr heddlu eu galw i'r digwyddiad ar Rodfa'r Gogledd am 18:40 nos Wener
Mae pump o bobl wedi cael eu harestio ar amheuaeth o achosi ffrwgwd yn dilyn digwyddiad yn Aberystwyth nos Wener.
Cafodd yr heddlu eu galw i'r digwyddiad ar Rodfa'r Gogledd yn y dref am 18:40, yn dilyn adroddiadau bod dau berson â chyllyll.
Dywedodd Heddlu Dyfed-Powys eu bod wedi arestio dau ddyn - 19 a 23 oed - ar amheuaeth o achosi ffrwgwd, a'u bod yn parhau yn y ddalfa.
Yn ôl y llu cafodd tri pherson arall - dau ddyn a dynes - eu harestio yn ardal Cross Hands, Sir Gâr yn ddiweddarach mewn cysylltiad â'r digwyddiad.
Dywedodd y Ditectif Brif Arolygydd Christina Fraser bod y llu "wedi derbyn nifer fawr o alwadau gan bobl oedd yn bryderus am y digwyddiad" nos Wener.
Ychwanegodd nad yw'r llu yn chwilio am unrhyw berson arall mewn cysylltiad â'r digwyddiad.