Democratiaid Rhyddfrydol i gynnal hystings ar-lein

Mae Layla Moran a Syr Ed Davey wedi canmol unig aelod y blaid yn y Senedd, Kirsty Williams

Bydd y Democratiaid Rhyddfrydol yn cynnal hystings arweinyddiaeth ar-lein ar gyfer aelodau'r blaid yng Nghymru ddydd Sadwrn.

Yr Aelodau Seneddol Syr Ed Davey a Layla Moran yw'r ddau ymgeisydd sy'n cystadlu am y rôl.

Cyhoeddir y canlyniad ar 27 Awst.

Collodd y Democratiaid Rhyddfrydol eu hunig Aelod Seneddol o Gymru yn yr Etholiad Cyffredinol diwethaf, a dim ond un sedd sydd gan y blaid yn Senedd Cymru.

Sedd yr aelod dros Frycheiniog a Sir Faesyfed Kirsty Williams yw honno, a hi hefyd yw Gweinidog Addysg Llywodraeth Cymru.

Bydd hystings dydd Sadwrn yn cael eu cynnal dros y we ac ar gael i bawb eu gwylio.

Ond dim ond aelodau'r Democratiaid Rhyddfrydol Cymreig fydd yn cael gofyn cwestiynau i'r ymgeiswyr.

Mae Syr Ed Davey wedi addo economi "wyrddach" fel rhan o'i ymgyrch

Ar ôl bod yn ddirprwy arweinydd yn ystod cyfnod Jo Swinson wrth y llyw, mae Syr Ed Davey wedi bod yn un o arweinwyr dros-dro'r blaid ers i Ms Swinson ymddiswyddo ar ôl colli ei sedd yn Nhŷ'r Cyffredin ym mis Rhagfyr.

Yn siarad â BBC Cymru cyn yr hystings, dywedodd Syr Ed fod ei "weledigaeth yn seiliedig ar economi wyrddach, cymdeithas decach a gwlad fwy gofalgar".

Ychwanegodd y byddai etholiad Senedd Cymru fis Mai nesaf yn "brif flaenoriaeth" o dan ei arweinyddiaeth wrth iddo ragweld y bydd y blaid yn cipio seddi ar sail "record anhygoel" Kirsty Williams fel gweinidog.

Kirsty Williams yw unig aelod y blaid yn Senedd Cymru

"Mae hi wedi dangos yr hyn y gall Democratiaid Rhyddfrydol ei wneud… Rydyn ni wedi dangos bod modd ymddiried ynom ni i ofalu am ddyfodol ein plant ac yn wir ddyfodol Cymru."

Pan ofynnwyd iddo a oedd yn poeni y gallai aelodau ei gysylltu â pherfformiad gwael y Democratiaid Rhyddfrydol yn yr Etholiad Cyffredinol o ystyried y rôl flaenllaw oedd ganddo o fewn y blaid ar y pryd, dywedodd AS Kingston a Surbiton ei fod yn gobeithio y bydd aelodau'r Democratiaid Rhyddfrydol yng Nghymru yn cydnabod ei fod wedi comisiynu adolygiad o strategaeth etholiadol y blaid oedd "yn ddi-flewyn ar dafod".

Roedd ymgyrch y blaid yn seiliedig ar atal Brexit a thra bod Syr Ed yn dweud y bydd y Democratiaid Rhyddfrydol yn parhau i fod o blaid Ewrop gydag ef fel arweinydd, mae e hefyd yn gobeithio dangos bod gan y blaid bolisïau eraill hefyd.

"Mae gennym ni negeseuon cryf iawn hyn ar swyddi gwyrdd i bobl ifanc, adfywio economi Cymru ac economi'r DU trwy sicrhau ein bod yn buddsoddi yn y dyfodol," meddai gan dynnu sylw at ei gefnogaeth i forlynnoedd llanw o amgylch Cymru a'r diwydiant awyrofod yng Nghymru.

Rhaid derbyn bod y blaid yn dechrau o "fan isel" meddai Layla Moran

Dywedodd Layla Moran, ar ôl 10 mlynedd mai ei neges hi yn yr hystings fydd bod "angen i ni newid fel plaid".

"Rhaid i ni gydnabod bod yna lawer o bleidleiswyr yng Nghymru yn benodol sy'n teimlo nad yw'r Democratiaid Rhyddfrydol ar eu hochr nhw mewn gwirionedd, nad ydyn ni wir yn siarad drostyn nhw."

Dywedodd fod y blaid yn canolbwyntio'n ormodol ar Lundain ac fe wnaeth hi gydnabod bod ymgyrchwyr yng Nghymru wedi eu "digalonni" gan yr Etholiad Cyffredinol diwethaf a'r penderfyniad i daro cytundeb gyda Phlaid Cymru a'r Gwyrddion dros adael i un o'r pleidiau'n unig sefyll mewn rhai etholaethau gyda'r nod o sicrhau Aelod Seneddol oedd o blaid aros yn yr Undeb Ewropeaidd.

Roedd gan AS Gorllewin Rhydychen ac Abingdon ganmoliaeth hefyd ar gyfer Kirsty Williams am ei "gwaith anhygoel" a dywedodd fod sicrhau ei bod yn cadw ei sedd fis Mai nesa'n "flaenoriaeth fawr".

Ac er yr hoffai weld mwy o Ddemocratiaid Rhyddfrydol yn cael eu hethol i Fae Caerdydd, "mae unrhyw beth heblaw dirywiad ar y pwynt hwn yn dda".

"Rhaid i ni dderbyn ein bod yn cychwyn o fan isel ond bydd y llwybr o dan fy arweinyddiaeth i yn mynd am i fyny nid am i lawr."

Ar ôl Brexit dywedodd Ms Moran fod angen i'r blaid ganolbwyntio nawr ar "faterion bara menyn y mae pobl wir yn poeni amdanyn nhw fel addysg, yr amgylchedd a'r economi".

Collodd Jane Dodds ei sedd mewn isetholiad llynedd

Mae Kirsty Williams ac arweinydd y blaid yng Nghymru Jane Dodds wedi dewis aros yn niwtral yn ystod y ras arweinyddiaeth.

Ms Dodds oedd unig Aelod Seneddol y blaid yng Nghymru ar ôl iddi gipio etholaeth Brycheiniog a Sir Faesyfed mewn isetholiad fis Awst y llynedd.

Collodd y sedd bedwar mis yn ddiweddarach.

Ar drothwy'r hystings heno, dywedodd Ms Dodds: "Rwy'n wirioneddol falch bod gennym ddau ymgeisydd cryf iawn yn sefyll i arwain ein plaid.

"Mae gan Layla ac Ed yr egni a'r ysfa i fynd â ni ymlaen, i ailadeiladu ein plaid ar lawr gwlad ac o'r llawr gwlad a dod â llwyddiant i ni eto ar draws y DU."