Cadarnhau gwaharddiad AS Reform Laura Anne Jones am bythefnos
- Cyhoeddwyd
Mae'r Senedd wedi cefnogi argymhelliad i wahardd yr unig aelod o blaid Reform am 14 diwrnod am dorri'r cod ymddygiad, oherwydd sylwadau sarhaus a wnaeth mewn sgwrs WhatsApp.
Cafodd y cynnig ei basio yn ddiwrthwynebiad.
Ym mis Awst 2023, defnyddiodd Laura Anne Jones sarhad hiliol i ddisgrifio pobl Tsieineaidd.
Wrth argymell y gosb, dywedodd pwyllgor safonau'r Senedd "nad oes lle i sylwadau amhriodol a sarhaus yn ein Senedd nac yn ein cymdeithas yn ehangach".
Ymddiheurodd Ms Jones "eto" am "sylwadau anffodus" mewn "neges breifat".
"Rwy'n derbyn yn llwyr" yr adroddiad, meddai, "doeddwn i erioed wedi bwriadu achosi unrhyw dramgwydd."
"Rwyf wedi bod mewn cysylltiad gweithredol â'r gymuned a grybwyllir."
Roedd yn ddagreuol wth siarad am yr effaith "dirdynnol" arni a'i theulu.
AS Reform Laura Anne Jones yn wynebu gwaharddiad am bythefnos
- Cyhoeddwyd7 o ddyddiau yn ôl
AS Reform yn gwadu ceisio gwneud y mwyaf o'i threuliau
- Cyhoeddwyd6 Medi
Mae'r gwaharddiad yn golygu na chaniateir iddi gymryd rhan mewn trafodion yn siambr y Senedd nac unrhyw bwyllgorau Bae Caerdydd dros y pythefnos nesaf ac na fydd yn cael ei thalu am y cyfnod hwnnw.
Fe wnaeth pwyllgor safonau'r Senedd argymell y gwaharddiad o 14 diwrnod yn dilyn ymchwiliad hir gan gomisiynydd safonau'r Senedd, Douglas Bain, dolen allanol.
Canfu fod Laura Anne Jones wedi gwneud sylwadau sarhaus ar WhatsApp a nad oedd hi wedi cymryd camau pan wnaeth un o'i staff sylwadau sarhaus yno.
Roedd Ms Jones, sy'n cynrychioli de ddwyrain Cymru, yn AS Ceidwadol pan wnaed yr honiadau.