Llifogydd wrth i law trwm a gwyntoedd cryfion daro Cymru

Mae llifogydd wedi achosi oedi difrifol ar yr A55 yn Abergwyngregyn

Mae llifogydd wedi taro rhai cymunedau ac mae trafnidiaeth wedi'i effeithio wrth i Storm Francis ddod â glaw trwm a gwyntoedd o hyd at 70mya i Gymru.

Dywedodd diffoddwyr eu bod yn delio â llifogydd yng Nghastell-nedd, Llanelli, Tonyrefail a Hendy-gwyn a nifer o fannau eraill.

Yn ôl y Cynghorydd Rob James mae "tua throedfedd o ddŵr" mewn rhai cartrefi yng Nghwm Gwendraeth, ac mae amodau gyrru yn "enwedig o anodd".

Daw wrth i'r Swyddfa Dywydd uwchraddio eu rhybudd am wyntoedd cryfion o felyn i oren.

Mae Heddlu'r Gogledd a Traffig Cymru wedi trydar i ddweud bod llifogydd ar yr A5 rhwng Bangor a Bethesda wedi cau'r lôn yno i'r ddau gyfeiriad, ac mae llawer o ddŵr ar yr A55 rhwng troadau Llanfairfechan a Dwygyfylchi yn golygu amodau gyrru anodd iawn yno.

Bu trafferthion hefyd ger Abergwyngregyn ar yr un lon. Mae'r heddlu'n apelio ar yrwyr i arafu yn yr ardal.

Dywed Traffig Cymru hefyd fod yr A5 o Nant Ffrancon i Capel Curig wedi cau oherwydd tirlithriad.

Cartrefi heb bŵer

Nos Fawrth fe gyhoeddodd Heddlu De Cymru eu bod nhw wedi gofyn i bobl yn ardal Stryd y Castell yng Nghaerdydd i adael yr ardal am fod sawl adeilad yno wedi eu difrodi.

Yn y de a'r gorllewin mae cannoedd o gartrefi heb drydan meddai cwmni Western Power Distribution.

Cafodd naw o bobl a dau gi eu hachub ar faes gwersylla Lakeside Leisure yn Sanclêr

Yn y gogledd a'r canolbarth fe ddywed Scottish Power bod cyflenwadau trydan wedi eu colli i tua 3,000 o gwsmeriaid yn ardaloedd Caernarfon, Betws-y-Coed, Blaenau Ffestiniog, Pwllheli, Y Trallwng, Machynlleth, Llanymynech, Drenewydd a Chaersws.

Bu'n rhaid i'r gwasanaethau brys achub grŵp o naw o bobl a dau gi ar faes gwersylla yn Sanclêr wedi i ddŵr eu gwahanu rhag gweddill y safle.

Dywedodd Cyfoeth Naturiol Cymru (CNC) bod lefel Afon Cynin yno dros ddau fetr yn uwch na'r lefel arferol.

Mae gan CNC rybuddion llifogydd mewn grym yn y de-orllewin ger afonydd Gwendraeth Fawr a'r Taf.

Dywedodd Meleri Clare Ennis ei bod wedi gorfod deffro ymwelwyr i'w gwneud yn ymwybodol o'r amodau

Roedd Parc Gwyliau Llwyngwair yn Nhrefdraeth, Sir Benfro yn un o'r rheiny gafodd eu heffeithio gan y tywydd garw fore Mawrth.

"O'n i'n ymwybodol o'r gwynt a'r glaw wrth ddeffro bore 'ma a gweld lefel y dŵr, ond o'dd e'n gyfnod pryderus iawn," meddai'r rheolwr Meleri Clare Ennis.

"O fewn amser byr iawn, fe gododd yr afon, felly o'dd hi'n amser bryd hynny i ddeffro'r ymwelwyr.

"Gobeithio bo' ni dros y gwaetha."

Ychwanegodd Patricia Lloyd Evans, sydd wedi bod yn aros yn y parc gwyliau: "O'dd pawb yn trial helpu'r rhai mewn trafferth ac o'dd angen adlenni lawr ar frys - y prif nod o'dd diogelwch pawb.

"O'dd y plant yn becso bo' ni'n mynd i orfod gadael, ond gan fod pethe 'di gwella ni'n mynd i aros."

Bu'r gwasanaeth tân ac achub yn tynnu dŵr o gartrefi yng Ngors-las, Sir Gâr fore Mawrth

Mae teithwyr wedi cael eu rhybuddio bod amodau gyrru yn anodd, ac y gallai trenau a fferïau gael eu heffeithio oherwydd y tywydd.

Mae'r M48 Pont Hafren ynghau oherwydd y gwyntoedd, a Phont Cleddau yn Sir Benfro ynghau i gerbydau sy'n dalach na 1.9m.

Mae un rheilffordd ger Castell-nedd wedi'i rhwystro gan ddŵr, ac mae nifer o drenau rhwng Abertawe a Chaerdydd yn wynebu oedi neu wedi'u canslo yn llwyr.

Dim ond ers ychydig wythnosau oedd Lake Spice wedi ailagor oherwydd y pandemig

Mae cwrs rasio ceffylau Cas-gwent eisoes wedi canslo'r rasys oedd i fod i gael eu cynnal yno ddydd Mercher, gan ddweud eu bod eisoes wedi cael 25mm o law yno ac yn disgwyl rhagor.

Yng Nghaerdydd fe achoswyd difrod i fwyty Lake Spice yn ardal Y Rhath wedi i goeden ddisgyn ar yr adeilad oherwydd y gwyntoedd cryfion.

Mae'r Swyddfa Dywydd wedi uwchraddio eu rhybudd am wynt o felyn i oren

Mae gan y Swyddfa Dywydd ddau rybudd am wynt ac un am law mewn grym nes fore Mercher.

Maen nhw wedi uwchraddio eu rhybudd i un oren, gyda disgwyl i'r gwyntoedd cryfaf daro Cymru rhwng 14:00 a 22:00 ddydd Mawrth.

Maen nhw'n rhybudd y gallai'r gwynt amharu ar gyflenwadau trydan, gyda'r perygl o goed yn disgyn mewn mannau.

Fe allai'r gwyntoedd hyrddio hyd at 70mya ar yr arfordir a'r bryniau, gyda gwyntoedd o 55-60mya yn gyffredinol.