Pobl ardal Dinas Mawddwy i elwa o fand eang cyflym iawn

Mae'r ardal yn ne Gwynedd wedi bod yn ymgyrchu am well band eang ers wyth mlynedd

Ar ôl wyth mlynedd o ymgyrchu bydd 70 o gartrefi a busnesau yn ardaloedd gwledig Llanymawddwy a Chwm Cywarch yng Ngwynedd yn cael eu cysylltu hefo band eang cyflym iawn gan Openreach.

Mae rhai yn yr ardal ger Dinas Mawddwy wedi cael eu cysylltu yn barod a bydd mwy dros yr wythnosau nesaf.

Mae wedi bod yn frwydr hir iawn ac un sy'n edrych ymlaen yn fawr i gael band eang cyflym yn y dyfodol agos ydy Lisa Roberts, sy'n ffermio fferm Pennant hefo'i gŵr Sion.

Dywed Lisa Roberts nad oes cysondeb o ran cyflymdra y we ar hyn o bryd

"Mi wnaiff wahaniaeth mawr," meddai.

"Ar y funud 'de ni'n ddibynnol ar y we drwy loeren felly'n amlwg mae'r cyflymdra yn dibynnu ar y tywydd ac ar y funud 'de ni'n cael cyflymder isel iawn.

"Mi wnaiff o fywyd yn haws, 'de ni'n dibynnu ar y we rŵan am gymaint o bethe ar gyfer y ffarm, mae gennym ni fythynnod gwyliau.

"Dwi'n dychwelyd i'r gwaith rŵan a gweithio o adref felly mae'n hanfodol i'n bywyd bob dydd ni yma."

• Yr ysgol olaf yng Nghymru i gael band eang

• Gall 'technoleg clyfar' helpu cymunedau gwledig

Daeth y gymuned wledig yn ne Gwynedd at ei gilydd i gydweithio er mwyn hel yr arian angenrheidiol.

Gwnaed hyn drwy dalebau gwerth rhyw £100,000 gan yr Adran Diwylliant, Cyfryngau a Chwaraeon a chyfrannodd Llywodraeth Cymru arian hefyd yn ogystal â chwmni Openreach.

Mae cwmni Openreach wedi gosod 36 o bolion newydd yn yr ardal

I ddod â band eang cyflym iawn i'r ardal bu'n rhaid i Openreach osod 21 cilomedr o geblau ffibr o'r gyfrinfa yn Nolgellau.

"Mae hwn wedi bod yn sialens beirianyddol enfawr i'n peirianwyr lleol," meddai Connie Dixon, cyfarwyddwr Partneriaeth Openreach yng Nghymru.

"Ond trwy ddarparu band eang cyflym iawn i gymuned Llanymawddwy mi rydyn ni'n pwysleisio ein bwriad i wneud band eang cyflym iawn ar gael i gymaint o bobl a phosib ar draws Cymru gan gynnwys yr ardaloedd sy'n anodd eu cyrraedd."

Dywedodd John Pughe Roberts fod y gymuned leol wedi gweithio'n galed iawn

Yn ôl y cynghorydd sir lleol John Pughe Roberts mae cael band eang cyflym i'r ardal yn benllanw blynyddoedd o waith.

Dywedodd y bydd y datblygiad o fudd mawr i bobl leol a busnesau'r ardal yn ogystal â'r genhedlaeth ifanc o ran addysg a'r economi.

"Mae o'n mynd i wneud gwahaniaeth enfawr i fusnesau lleol," meddai.

"Mae 'na un yn cyfieithu i wahanol gwmnïau ac ati ac mae rhai eraill yn cadw tai haf, wrth gwrs bydd y rheiny yn gallu gwneud popeth ar-lein."

Ychwanegodd y bydd cymunedau eraill hefyd yn gallu elwa ar gynllun o'r fath gydag ychydig o ymdrech.

"Unrhyw gymuned sydd hebddo fo rŵan cerwch amdano fo," meddai.

"Os ydach chi isio fo mae 'na ffordd i gael pob peth ond rhaid i chi weithio'n galed."