Gwaith gwerth £25m ar adnewyddu traphont Y Bermo

Mae'r gwaith paratoi wedi bod yn mynd rhagddo ers mis Mehefin

Fe fydd gwaith atgyweirio gwerth £25m yn dechrau go iawn yr wythnos nesa ar draphont Y Bermo sy'n croesi aber Afon Mawddach yng Ngwynedd.

Mae disgwyl i'r gwaith ar y bont hanesyddol restredig Gradd II gymryd hyd at ddwy flynedd i'w gwblhau.

Dywed Network Rail y bydd 1,000 o ddarnau pren y bont bresennol yn gorfod cael eu hadnewyddu.

Fe fydd traciau newydd hefyd yn cael eu gosod ar y bont 820 metr o hyd.

Fe gafodd y bont wreiddiol ei chodi yn 1864 ar gyfer rheilffordd Lein y Cambrian sy'n cludo teithwyr rhwng Pwllheli a Machynlleth

Dywedodd y cynghorydd sir lleol Eryl Jones Williams fod y bont yn bwysig iawn i'r ardal.

"Heb y bont yma, byddai'r lle yma yn colli allan yn ddifrifol".

Mae Lein y Cambrian yn gwasanaethu rhwng Pwllheli i Machynlleth

Dywed y Cyngnorydd Eryl Jones-Williams fod y bont yn denu ymwelwyr i'r ardal

"Dwi'n falch o ran y gymuned. 'Neith o bara tua 100 mlynedd, "meddai Mr Jones-Williams sydd hefyd yn gadeirydd Pwyllgor Rheilffordd y Cambrian.

"Mae'n dod â phobl i mewn yma, ac mae'r bont ei hun yn denu pobl. Mae pobl yn cerdded drosto fo," meddai.

"Mae 'na lot fawr o bobl sy' ond yn dod yma i weld y bont."

Dywedodd Bill Kelly, un o gyfarwyddwyr Network Rail fod y draphont yn un bwysig ac adnabyddus.

"Rydym yn buddsoddi £25m er mwyn rhoi i'r Draphont ei adnewyddiad mwyaf yn ei hanes, gan ddiogelu ein treftadaeth ddiwydiannol a sicrhau fod cyswllt trafnidiaeth bwysig yn parhau i wasanaethau pobl leol ac ymwelwyr ar gyfer y cenedlaethau i ddod."