Gwynedd: Ymestyn cyfyngiadau'n 'debygol' cyn hir

BangorGetty Images

Ar hyn o bryd, Bangor yw'r unig le o dan gyfyngiadau lleol penodol yng Ngwynedd

Mae arweinwyr Cyngor Gwynedd wedi awgrymu y bydd cyfyngiadau coronafeirws lleol yn cael eu hymestyn ar draws weddill y sir "cyn hir".

Mewn cyfarfod â'r cabinet dydd Mawrth, dywedodd arweinydd y cyngor, Dyfrig Siencyn, ei bod yn edrych yn "debygol" bydd angen ehangu'r ardal sydd o dan gyfyngiadau lleol penodol o ganlyniad i'r cynnydd mewn achosion y tu allan i Fangor.

Daeth cyfyngiadau lleol mewn i rym yn ninas Bangor am 18:00 nos Sadwrn.

Heblaw am ddinas Bangor, Gwynedd ac Ynys Môn yw'r unig siroedd yng ngogledd Cymru sydd ddim o dan gyfyngiadau lleol penodol ar hyn o bryd.

Dywedodd Dyfrig Siencyn bod rhagor o gyfyngiadau yng Ngwynedd yn debygol

Yn ôl Mr Siencyn: "Wrth i ffigyrau gynyddu yn ardaloedd arall o'r sir, mae'n edrych yn bendant fel bydd ardal ehangach o'r sir o dan gyfyngiadau penodol cyn hir."

"Pwy all wir ddeud? Ond mae nifer yr achosion bendant yn mynd yn y cyfeiriad anghywir."

Ychwanegodd: "Mae'n rhaid i ni gofio bod ymdrechion mewn lle i geisio lleihau lledaeniad y feirws ac i atal mwy o wasgedd ar ein gwasanaeth iechyd ac unrhyw farwolaethau diangen."

Ychwanegodd bod y mater wedi cael ei godi gyda Llywodraeth Cymru.

Mae'r ffigyrau diweddaraf yn dangos bod cyfradd yr achosion yng Ngwynedd yn 91.5 i bob 100,000 person ar gyfer yr wythnos ddiwethaf.

Ond mae'r nifer o achosion yn amrywio yn sylweddol o un ardal i'r llall.

Yn ardal Arfon - sy'n cynnwys Bangor - mae'r gyfradd yn 152 achos am bob 100,000 person, o'i gymharu â 55 yn Nwyfor ac 18 ym Meirionydd.

Yn y gorffennol, mae Llywodraeth Cymru wedi awgrymu byddai cyfradd o 50 achos am bob 100,000 person yn gallu arwain at gyfyngiadau lleol.

Mae'r cyfyngiadau lleol ym Mangor yn effeithio ar 16,000 o ddinasyddion

Cyn belled, mae 15 sir yng Nghymru yn destun cyfyngiadau lleol penodol, gyda Bangor a Llanelli yn Sir Gaerfyrddin yr unig ddinasoedd a threfi sydd dan gyfyngiadau lleol penodol.

Ym Mangor, mae'r mesurau'n berthnasol i wyth o wardiau - Garth, Hirael, Menai, Deiniol, Marchog, Glyder, Hendre a Dewi.

Nid oes modd teithio i mewn nac allan o'r wardiau dan sylw heb esgus rhesymol, sy'n cynnwys teithiau gwaith ac addysg.

Straeon perthnasol