Seiclwr, 16, wedi marw mewn gwrthdrawiad gyda char
- Cyhoeddwyd
Digwyddodd y gwrthdrawiad ychydig cyn 14:00 ddydd Gwener
Mae bachgen 16 oed wedi marw yn dilyn gwrthdrawiad yng Nghasnewydd brynhawn dydd Gwener.
Roedd y bachgen yn teithio ar gefn beic pan fu mewn gwrthdrawiad â Ford Focus llwyd ar Ffordd Ddosbarthu'r De.
Mae gyrrwr y car, dyn 28 oed o ardal Rhondda Cynon Taf, wedi'i arestio ar amheuaeth o achosi marwolaeth trwy yrru'n beryglus, ac mae'n y ddalfa.
Mae swyddogion yn cefnogi teulu'r bachgen fu farw ac mae ymholiadau'r llu yn parhau.
Digwyddodd y gwrthdrawiad y tu allan i dafarn y Blaina Wharf ychydig cyn 14:00.
Cafodd y ffordd ei chau i'r ddau gyfeiriad am rai oriau wedi'r digwyddiad.
Mae Heddlu Gwent yn apelio am wybodaeth.