Galw am sicrwydd ynghylch llwyth gwaith athrawon

Mae undeb addysg yn gofyn am sicrwydd na fydd llwyth gwaith athrawon yn cynyddu ar ôl i arholiadau TGAU, AS a Safon Uwch Cymru yn haf 2021 gael eu canslo.

Ddydd Mawrth, cyhoeddodd y Gweinidog Addysg Kirsty Williams, y bydd asesiadau'n cael eu cynnal o dan oruchwyliaeth athrawon, gan ddechrau yn ail hanner tymor y gwanwyn.

Byddan nhw'n cael eu gosod a'u marcio'n allanol ond yn cael eu darparu yn yr ystafell ddosbarth.

Mae undeb NASUWT Cymru yn "croesawu'r penderfyniad" ond yn rhybuddio na ellir disgwyl i athrawon "ystyried, paratoi, asesu, safoni a chymedroli" y system gymwysterau newydd.

• Canslo arholiadau TGAU a Safon Uwch Cymru yn 2021

• 'Croesawu peidio cael TGAU ond angen eglurder buan'

Wrth siarad ar ran yr undeb, dywedodd Sion Amlyn ei bod yn hanfodol bod cymaint o'r llwyth gwaith yn cael ei dynnu oddi ar yr athrawon â phosibl.

"Mae cwestiynau o hyd o ran beth yn union fydd y mecanwaith," meddai.

"Pan 'dach chi'n ystyried be ma' pawb wedi bod drwyddi yn ddiweddar a pan 'dach chi'n ystyried hynny mewn cyd-destun ysgol, plant efallai mewn ac allan o'r sefydliad am gyfnodau hir ar y tro, ma'n aelodau ni'n dweud eu bod nhw'n cael trafferth mawr cwblhau'r gwaith.

"'Dan ni'n gofidio bydd y drefn newydd yma yn drwm ar lwyth gwaith. Felly mae'n bwysig, beth bynnag fydd y mecanwaith, bod yr asesu, y cymedroli a'r safoni yn digwydd gan CBAC neu le bynnag, a fydd hwnna'n rhyddhau'r athrawon i ymgymryd â'r gwaith paratoi'r disgyblion."

Ond ychwanegodd Mr Amlyn ei bod yn fuddiol bod penderfyniad wedi bod fel y gall athrawon gynllunio ymlaen llaw.

Dywedodd Kirsty Williams y byddai canslo arholiadau yn rhoi amser i addysgu barhau drwy dymor yr haf gan ychwanegu y byddai gan athrawon hyblygrwydd o ran pryd i gynnal yr asesiadau, yng nghyd-destun amserlenni canlyniadau.