Ymdrechion yn Llandeilo i ddenu siopwyr lleol

Roeddwn yn gweld cael pop-up yn syniad da i fusnesau'r ardal, medd Lisa Jones

Mae arwyddion y bydd siopa yn lleol yn llawer mwy poblogaidd eleni ar drothwy'r Nadolig.

Mae cyfyngiadau Covid-19 wedi newid arferion siopa, ac mae arolwg newydd a gomisiynwyd gan Visa yn awgrymu fod 70% o bobl yng Nghymru yn credu ei bod yn bwysig cefnogi siopau lleol y Dolig hwn.

Fore Mawrth, 24 Tachwedd bydd Pop-Up Llandeilo yn agor ei ddrysau ar y stryd fawr yn y dre a bydd cyfle i gynhyrchwyr lleol werthu o dan yr un to.

Dywed Lisa Jones sydd yn berchen ar yr adeilad: "O'dd y siop yn wag 'da ni, a 'naethon ni benderfynu bo' cyfle fan hyn i agor siop pop-up ar gyfer y Nadolig.

"O'n i'n gweld fod busnesau bach wedi colli mas ar ddigwyddiadau a ffeiriau Nadolig, a meddwl y bydde hyn yn gyfle gwych."

Colli'r gwmnïaeth

Yn ôl arolwg gan Visa, roedd 56% o'r rhai a holwyd yn dweud fod cefnogi busnesau lleol yn eu gwneud yn hapus a dros 70% yn poeni am ddyfodol busnesau bychain annibynnol yn yr hinsawdd presennol.

Eleri Haf Designs fydd un o'r stondinau yn Pop-up Llandeilo sydd yn gwerthu cardiau cyfarch a bagiau cotwm.

"Ma' hyn yn lyfli gan bod ni methu gwneud ffeiriau eleni," medd Eleri Haf

"Sai 'di neud rhwybeth fel hyn o'r blaen," eglura Eleri Haf o Landybie.

"Fi fel arfer yn gwneud ffeiriau Nadolig, ond ma' hyn yn lyfli gan bod ni methu gwneud ffeiriau eleni."

Dywed Eleri ei bod wedi colli cwmnïaeth cwsmeriaid yn ystod y flwyddyn.

"Mae hynny 'di bod yn drist - methu gweld cwsmeriaid a chwrdd wyneb yn wyneb. Felly dwi'n edrych 'mlaen at hynny."

Bydd amrywiaeth o stondinwyr yn y siop yn Llandeilo.

"Mae tua 15 o fusnesau 'da ni, ac roedd hi'n bwysig cael trawsdoriad, fel bod amrywiaeth o anrhegion ar gael, o fwyd i emwaith a bagiau," eglura Lisa Jones.

"Mae'n rhan o fy ngwaith i helpu busnesau ar gyfryngau cymdeithasol, a'r trend ydy fod pobol mo'yn cefnogi yn lleol eleni.

"Ni hefyd yn credu falle na fydd pobol yn teithio o'r ardal hon i lefydd fel Caerdydd ac Abertawe i wneud eu siopa Dolig, a'u bod yn hapus i ddod i Landeilo a chefnogi'n lleol."

Mae arolwg newydd yn awgrymu fod 70% yng Nghymru yn credu ei bod yn bwysig cefnogi siopau lleol eleni

Drwy wario deg punt gyda busnes lleol, mae gwerth £3.80 yn aros yn yr ardal - dyna gasgliad yr ymgyrch Where You Shop Matters gan Visa .

A thrwy ddewis siopa'n lleol y Nadolig hwn, mae'r ymgyrch yn nodi y gallai cwsmeriaid ddyblu'r swm sy'n aros yn eu hardal leol.