Rhybuddion melyn am law trwm i Gymru dros y dyddiau nesaf

Dyma'r rhybudd ar gyfer dydd Sadwrn, ac mae un tebyg iawn mewn grym ar gyfer dydd Llun hefyd

Mae'r Swyddfa Dywydd wedi cyhoeddi dau rybudd melyn am law trwm ar gyfer rhannau helaeth o Gymru dros y penwythnos a dechrau'r wythnos nesaf.

Dywedodd y Swyddfa Dywydd fod disgwyl glaw trwm ddydd Sadwrn a dydd Llun yn yng nghanolbarth a de Cymru.

Gallai hyn darfu ar wasanaethau trenau a bysiau yn ogystal ag effeithio ar drafnidiaeth ar y ffyrdd.

Fe allai'r tywydd achosi llifogydd mewn mannau gan achosi difrod i rai adeiladau.

Mae'r rhybuddion melyn am law trwm mewn grym ar gyfer holl siroedd canolbarth a de Cymru rhwng 06:00 a 23:59 ddydd Sadwrn, ac yna rhwng 00:00 a 15:00 ddydd Llun.

Llifogydd eto?

Mae rhybudd y gallai hyd at 30mm o law ddisgyn yn eang ar draws de Cymru ddydd Sadwrn, ac y gallai hyd at 80mm gronni mewn ardaloedd uchel sy'n wynebu'r gwynt yn y de.

Wedi iddi gilio ddydd Sul, mae rhybudd arall tebyg iawn mewn grym i'r un mannau ddydd Llun.

Dywedodd y Swyddfa Dywydd y gallai'r glaw achosi llifogydd i rai cartrefi a busnesau, a'i bod yn bosib y bydd rhai yn colli cyflenwad trydan yn sgil y tywydd garw.

Daw y rhybuddion diweddaraf yn dilyn llifogydd difrifol yn y de-orllewin a Sir Fynwy yn ddiweddar.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.