Cwpan y Byd: Cymru i herio tîm gorau'r byd

Wrth i'r enwau ddod o'r het ar gyfer rowndiau rhagbrofol Cwpan y Byd 2022, cafodd Cymru wybod y byddan nhw'n herio Gwlad Belg.

Y Belgiaid sydd ar frig rhestr detholion y byd ar hyn o bryd.

Cafodd Cymru eu gosod yn Grŵp E, sy'n golygu eu bod mewn grŵp o bum tîm yn hytrach na chwech.

Fe fydd gan Gymru gemau hefyd yn erbyn Y Weriniaeth Siec, Belarws ac Estonia.

Bydd enillwyr y 10 grŵp yn mynd ymlaen i rowndiau terfynol y gystadleuaeth.

Fe fydd y timau sy'n gorffen yn ail yn y grwpiau yn mynd i'r gemau ail gyfle ynghyd â'r ddau dîm gorau o Gynghrair y Cenhedloedd sydd ddim eisoes yn y gemau ail gyfle.

Os na fydd Cymru yn y ddau uchaf yng Ngrŵp E, mae posibilrwydd bod gorffen ar frig eu grŵp yng Nghynghrair y Cenhedloedd yn rhoi lle iddyn nhw yn y gemau ail gyfle.

Fe fydd y gemau yn y rowndiau rhagbrofol yn dechrau ym mis Mawrth 2021.