Mwy o rybuddion am eira a rhew dros y dyddiau nesaf

Mae 'na rybudd am eira a rhew ar gyfer y gogledd rhwng 18:00 ddydd Mercher a 14:00 ddydd Iau

Mae'r Swyddfa Dywydd wedi cyhoeddi rhybuddion pellach am eira a rhew i rannau o Gymru dros y dyddiau nesaf.

Roedd rhybudd melyn am rew mewn grym ar gyfer rhan helaeth o'r gogledd rhwng nos Fawrth a bore Mercher.

Roedd rhybudd melyn arall am eira a rhew i rannau o dde Cymru o 10:00 fore Mercher tan 06:00 fore Iau, ond mae hwnnw bellach wedi'i ddiddymu.

Ond mae 'na rybudd arall mewn grym am eira a rhew ar gyfer y gogledd rhwng 18:00 ddydd Mercher a 14:00 ddydd Iau.

Dywedodd y Swyddfa Dywydd ei bod hi'n bosib y gallai 1-3cm o eira ddisgyn mewn rhai mannau, gyda hynny'n codi i 5cm mewn ambell fan.

Roedd Llandrindod yn un o'r llefydd gafodd eira ddydd Llun

Maen nhw hefyd wedi rhybuddio y gallai'r tywydd rhewllyd effeithio ar y ffyrdd ac achosi amodau gyrru anodd.

Cafwyd rhybuddion tywydd garw yn gynharach yn yr wythnos wrth i Storm Bella daro, gan greu trafferthion teithio a thoriadau i'r cyflenwad trydan yn dilyn gwyntoedd dros 80mya.

Dywedodd cwmni Western Power fod dros 1,700 o eiddo heb drydan yn ystod y penwythnos.

Cyn hynny dioddefodd rhai cartrefi a busnesau lifogydd, yn bennaf yn y de, yn dilyn glaw trwm.