Ar ddiwedd 2020: Cerdd gan Christine James
- Cyhoeddwyd
Ar ddiwrnod olaf y flwyddyn, dyma gerdd arbennig ar gyfer darllenwyr Cymru Fyw gan Christine James.
Bardd ac academydd a fagwyd yn ardal y Rhondda yw Christine James. Fe enillodd gystadleuaeth y Goron yn Eisteddfod Genedlaethol Eryri yn 2005 a hi oedd y fenyw gyntaf i gael ei hethol yn Archdderwydd.
Oera marwor ugain-ugain ar aelwydydd,
aeth Nadolig arall heibio yn ei dro;
parsel heb ei agor ydi'r flwyddyn newydd.
Cadw pellter, colli swyddi, prinder bwydydd -
hir y cofiwn gyfyngiadau'r Cyfnod Clo:
oera marwor ugain-ugain ar aelwydydd.
Blino'n syllu'n gyson ar yr un hen walydd,
cyfarfodydd Zoom yn gyrru pawb o'u co';
parsel heb ei agor ydi'r flwyddyn newydd.
Gwylio'r graffau'n codi'n sydyn, uwch-uwch beunydd,
gormod yn annhymig-orwedd yn y gro:
oera marwor ugain-ugain ar aelwydydd.
Ond gyda'r Calan daw gobaith gweld yr hafddydd,
buddugoliaeth brechlyn, gyrru'r haint ar ffo:
parsel heb ei agor ydi'r flwyddyn newydd.
Ac yna'r gwres! Fe gawn brofi hen lawenydd
dod ynghyd, un teulu eto dan un to.
Oera marwor ugain-ugain ar aelwydydd,
ac anrheg heb ei hagor yw pob blwyddyn newydd.
Christine James
Christine James yw bardd y mis Radio Cymru ar gyfer mis Rhagfyr.
Hefyd o ddiddordeb: