44 yn rhagor yn marw gyda Covid-19 yng Nghymru

Mae Iechyd Cyhoeddus Cymru wedi cofnodi 44 yn rhagor o farwolaethau sy'n gysylltiedig â Covid-19.

Hefyd fe gofnodwyd 796 o achosion newydd ar draws Cymru yn y cyfnod 24 awr mwyaf diweddar.

Mae'n golygu fod cyfanswm y marwolaethau ers dechrau'r pandemig bellach yn 4,530, a nifer yr achosion wedi codi i 187,711.

Cyhoeddodd ICC hefyd fod 23,991 o bobl yn rhagor wedi derbyn eu dos cyntaf o'r brechlyn, sy'n codi'r cyfanswm i 264,538.

Mae hynny'n gyfystyr â 8.4% o boblogaeth Cymru.

Am y tro cyntaf, Sir Y Fflint oedd â'r nifer dyddiol uchaf o achosion, sef 119.

Roedd yna 82 o achosion newydd yn Wrecsam, 78 yng Nghaerdydd, 45 yng Nghaerffili, 38 ym Mhen-y-bont ar Ogwr, a 37 yr un yn Abertawe a Chasnewydd.

Roedd yna ostyngiad pellach yn y cyfraddau achosion ar draws Cymru dros saith diwrnod - o 261 i 245 achos i bob 100,000 o'r boblogaeth.

Wrecsam sy'n parhau â'r gyfradd achosion uchaf dros saith diwrnod, sef 564.1.

Sir Y Fflint sy'n ail gyda chyfradd o 425.4, gyda Chasnewydd wedyn â chyfradd o 315.5 a Sir Ddinbych gyda 308.3.

O'r marwolaethau diweddaraf i'w cofnodi, roedd 12 yn ardal Bwrdd Iechyd Betsi Cadwaladr; 11 yng Nghaerdydd a'r Fro; wyth yn ardal Bwrdd Iechyd Aneurin Bevan; saith yn ardal Cwm Taf Morgannwg; pedwar yn ardal Hywel Dda; a dau yn ardal bwrdd Bae Abertawe.

Cafodd 13,224 yn rhagor o brofion eu cynnal yn y cyfnod dan sylw.