Pedwar achos pellach o amrywiolyn De Affrica yng Nghymru

Mae pedwar achos arall o amrywiolyn De Affrica o'r coronafeirws wedi cael eu cadarnhau yng Nghymru.

Daw hyn â chyfanswm achosion yr amrywiolyn hwn i 17.

Dywedodd Iechyd Cyhoeddus Cymru (ICC) bod pob un o'r pedwar achos newydd naill ai'n gysylltiedig â theithio dramor, neu gyda chysylltiadau perthnasol eraill.

Nid oes tystiolaeth o unrhyw drosglwyddo cymunedol ehangach wedi digwydd.

Strategaeth effeithiol

Mae tri o'r achosion yng ngorllewin Cymru, gyda theithio dramor yn ffactor ymhob un.

Daeth y pedwerydd i'r amlwg trwy olrhain cysylltiadau perthnasol gydag achos a oedd eisoes wedi'i gofnodi yn ardal Castell-nedd Port Talbot.

Dywedodd Dr Giri Shankar, Cyfarwyddwr Digwyddiad ar gyfer ymateb i coronafeirws gyda ICC, bod adnabod yr achosion diweddaraf yn dangos pa mor effeithiol oedd y strategaeth Profi, Olrhain a Diogelu.

"Mae hwn yn nifer fechan o achosion ac nid oes tystiolaeth ar hyn o bryd i ddweud bod trosglwyddiad cymunedol parhaus wedi digwydd," meddai.

"Nid oes tystiolaeth bod amrywiolyn De Affrica yn achosi salwch mwy difrifol; mae peth tystiolaeth yn awgrymu ei fod yn gallu lledaenu'n haws, a bod brechlynau - er yn dal yn effeithiol - ddim yn gweithio cystal yn ei erbyn.

"Oherwydd ymddangosiad amrywolion newydd a mwy trosglwyddadwy mae hi hyd yn oed yn fwy hanfodol ein bod ni oll yn glynu at y cyfyngiadau clo a ddim yn cwrdd â phobl eraill."