Achosion clwstwr Covid-19 ffatri fwyd Y Bala wedi cynyddu

Mae nifer yr achosion o Covid-19 sy'n gysylltiedig â ffatri fwyd yn Y Bala wedi cynyddu.

Ddydd Mercher, daeth cadarnhad bod yr awdurdodau'n ceisio rheoli clwstwr o achosion ymhlith gweithlu Cake Crew.

Dywedodd Cyngor Gwynedd ddydd Gwener bod nifer yr achosion wedi cynyddu o 42 i 48.

Mae'r cwmni cacennau yn cyflogi 330 o bobl.

Agor uned brofi

Dywedodd y cyngor hefyd bod un disgybl o ysgol leol wedi cael prawf positif am yr haint o ganlyniad i'r clwstwr yn y ffatri.

Dywedodd llefarydd ar ran tîm aml-asiantaeth sy'n delio gyda'r digwyddiad eu bod yn "gweithio'n agos gyda'r cwmni i reoli'r sefyllfa".

Dywedodd Cyngor Gwynedd y byddai uned brofi Covid-19 yn agor yn Y Bala o ddydd Sadwrn ymlaen.

Bydd yr uned ym Maes Parcio'r Grîn ar agor rhwng 12:00-16:30.

Yn ôl ffigyrau diweddara' Iechyd Cyhoeddus Cymru, mae'r gyfradd achosion wythnosol fesul 100,000 o'r boblogaeth yng Ngwynedd yn 28.1, yr uchaf drwy Gymru.

Y ffigwr ar gyfer Cymru gyfan ydy 14.7.